• 16 Qazan, 2015

Bir ýys bıdaı

550 ret

kórsetildi

2 mın

oqý úshin

Egemen Qazaqstan

Kúndelikti «Egemendi» oqyp, qarap otyryp, men de qolyma qalam aldym. Sizderdiń gazette soǵysqa qatysqan ákeler, atalar jaıly maqalalar jıi beriledi. О́zime jaqyn taqyryp bolǵan soń, birden qarap oqı bastaımyn. Ákem Slámǵalı Toqtarov 1941 jyly jeltoqsanda Mańyraq taýy etegindegi Jarsý aýylynan maıdanǵa shaqyrtý alady. Maıdanger marshal Tımoshenko basqarǵan 2-shi Ekpindi armııanyń 58-atqyshtar brıgadasynda bólimshe komandıri bolady. Ol Máskeý túbindegi Kalının, Volhov maıdandaryna, Lenıngrad baǵytynda bolǵan shaıqastarǵa qatysady. 1942 jyldyń tamyzynda Kalının baǵytyndaǵy urystarda jaralanady. Gospıtalde jatqan kezinde Panfılov dıvızııasy jaýyngerlerimen kezdesedi. Jerlesterine qosylǵysy kelgen ákem ótinish bildiredi. 1942 jyldyń jeltoqsan aıynda osy dıvızııanyń quramyndaǵy 23-gvardııalyq atqyshtar polkine (Muhamedııarovtyń polki) vzvod komandıri retinde soǵysqa qaıta jiberiledi. Osy jerde Baýyrjan Momyshulymen tanysady. Soǵys bitken soń, aman-esen eline oraldy. Muǵalimdik qyzmetin qaıta jalǵastyrady. Urpaqtary ósip-ónip otyr. Bárimiz oqý-bilim qýyp, jan-jaqqa kettik. Bárimiz bas qosqanda ákemizdi saǵyna eske alamyz. Aıtqan áńgimeleri áli jadymyzda. Bir aıtqany bar edi: Soǵystan soń Zaısan aýdandyq ishki ister bólimine qyzmetke jiberiledi. Sondaǵy bir oqıǵa mynadaı. 1945 jyly Ishki ister halyq komıssarıatynyń aýdandyq bólimshesi aýyl turǵyny, jesir áıel un tartý kezinde oramalǵa túıip bir-eki ýys bıdaı urlady degen habar alady. Soǵystan keıingi kezderi mundaı áreket úshin 10 jylǵa ketetin. Ákemizge tintý júrgizý tapsyrylady. Bir ýys bıdaı urlady degen úıge keledi. Eski, jupyny tam, shıetteı balalar. Ákeleri soǵystan qaıtpaǵan. Olar jer ústelde oramalǵa túıip ákelgen bir ýys bıdaıdy talǵajaý etýde eken. Ákemiz bıdaıdy oramalǵa qaıta túıip, sómkesine salyp, shyǵyp ketedi. Áıelge úndeme dep belgi beredi. Yńǵaıly sátin taýyp, oramaldy qalyń qardyń astyna kómip tastaıdy. Jumysqa keledi de áriptesterine ol úıde eshteńe joq eken dep aıtyp, isti jabady. Sóıtip, jetim balalardyń anasy aıdaýdan aman qalady. Ákemiz osyndaı adam edi. Qazir ol kisini saǵynyshpen eske alamyz. Aıgúl JAQSYLYQOVA. PAVLODAR.