Densaýlyq saqtaý salasy serpindi damýda

Keshe tústen keıin Elbasy Nursultan Nazarbaev jumys saparymen Aqtóbege keldi. Memleket basshysy birden oblystyq kóp salaly aýrýhanaǵa atbasyn tiredi. Aq halattylar sáýirdiń shýaǵyndaı aqjarqyn qýanyshty júzben qarsy aldy. Munda Elbasy aýrýhana ujymymen kezdesti. Bul emdeý mekemesi Prezıdent N.Nazarbaevtyń bastamasymen «100 mektep, 100 aýrýhana» memlekettik baǵdarlamasy aıasynda salynǵan-dy. 320 kereýettik oblystyq kópsalaly aýrýhana qurylysyna 11,8 mıllıard teńge jumsaldy. Aýrýhana osy zamanǵy ozyq medısınalyq qural-jab­dyqtarmen jabdyqtalǵan. Emdeý mekemesinde keń aýqymdy 1,5 Tesla magnıtti-rezonansty tomograf, angıografııalyq, rentge­nologııalyq, endoskopııalyq jáne reanımasııalyq qondyrǵylar, taza orta, medısınalyq gaz júıe­leri, qazirgi zamanǵa saı ekspert­klasty ýltradybystyq skaner­ler, «jasandy búırek» jáne «jasandy baýyr» apparat­tary, barokameralar bar. Aýrý­hananyń jalpy qabyldanǵan 24 bó­liminen basqa, oblystaǵy bir­den-bir endokrınologııalyq, oto­larıngologııalyq, ýrologııalyq, qan tamyrlary hırýrgııasy, GBO bólimsheleri de osynda jumys isteıdi. Munda emdeýdiń, ota jasaýdyń jańa tehnologııalary engizilgen, aorta-orta jilikti ushtastyrý, vaskýlıarly operatıvti aralasý, jambas-ortan jilik jáne tize býyndaryn endoprotezdeý, transplantologııa, keń aýqymdaǵy endobeınehırýrgııa sııaqty kúrdeli operasııalar jasalady. Elbasyn jańa aýrýhananyń jumysymen egjeı-tegjeıli tanys­tyryp ótken oblystyq densaýlyq saqtaý basqarmasynyń basshysy Áset Qalıev óńirdegi osy saladaǵy oń ózgeristerge de toqtala ketti. Onyń málimdeýinshe, 2014 jyly densaýlyq saqtaý salasyna jumsalǵan qarajat mólsheri 31,0 mlrd. teńgeni quraǵan. О́tken jyly densaýlyq saqtaý mekemelerin salý jáne kúrdeli jóndeý boıynsha eki memlekettik baǵdarlama oıdaǵydaı aıaqtalǵan. Eldi mekenderde 10 dárigerlik ambýlatorııa paıdalanýǵa berilip, 138 jumys orny ashylyp, 16 densaýlyq saqtaý nysany kúrdeli jóndeýden ótkizilgen. Elbasy sóz arasynda basqarma bas­shysynan bala týý men sábı­ler­diń shetineý jaǵdaıyn surady. О́z sózinde Áset Qalıev ótken jyldyń qorytyndysy boıynsha bala týý kórsetkishi 0,4 paıyzǵa artyp, 19740 sábı dúnıege kel­genin, halyqtyń tabıǵı ósimi kóterilgenin jetkizdi. Áleýmettik mańyzy bar aýrýlardan bolatyn ólim-jitim sany tómendep, ási­rese, bala ólimi táýelsizdik alǵan jyldardan bergi ýaqytta bes esege deıin kemigenin, aýrýdy erte anyqtaý nátıjesinde sońǵy on jylda ómir súrý uzaqtyǵy 5,6 jasqa artyp, aqtóbelikterdiń ortasha ómir súrý deńgeıi ótken jyly 71,6 jasqa jetkenin málim etti. Sodan keıin Nursultan Ábish­­uly kezdesýge jınalǵan aq ha­lattylarmen áńgimelesti. Qa­zaq­stan Prezıdenti bul aý­rý­hananyń jańa ǵımaratta or­nalasqanyn, zamanaýı qu­ral­darmen jabdyqtalǵanyn atap ótti. – Kóp nárse endi sizderge baılanysty. Eger óz jumystaryńyzdy sapaly atqaryp, qolda bar jabdyqtardyń múmkindigin tolyq paıdalanatyn bolsańyzdar, halyq densaýlyǵyn jaqsartýǵa zor úles qosasyzdar. Bizdiń elimizde densaýlyq saqtaý salasyna zor kóńil bólinip otyr, Qazaqstan jan basyna shaqqanda bul salaǵa bólinetin qarajat kólemi jóninen damyǵan elder deńgeıine taıap keledi. Respýblıkada sońǵy 20 jylda myńǵa jýyq densaýlyq saqtaý nysany salyndy. Halyq otandyq medısınaǵa senim arta bastady, al kórshi elderdiń azamattary emdelý úshin bizge keletin boldy, – dedi Memleket basshysy. Sóziniń sońynda Nursultan Na­­zarbaev medısına qyzmet­ker­lerine tabys jáne baq-bereke tiledi. Kezdesýde sóz alǵan aýrý­hananyń gospıtaldy hırýrgııa bóliminiń meńgerýshisi Bazyl­bek Jakıev, endokrınologııa bóliminiń meńgerýshisi Vladı­mır Kotlobovskıı, densaýlyq salasynyń ardageri Izbasqan Aımaǵambetov Qazaqstan Pre­zıdentine respýblıkada den­saýlyq saqtaý salasyn damytýǵa, biliktilikti arttyrýǵa jáne táji­rıbe almasýǵa qajetti jaǵdaı jasalǵany úshin zor rızashy­lyqtaryn bildirdi. Satybaldy SÁÝIRBAI, «Egemen Qazaqstan». Aqtóbe oblysy.