«Mıllıon teńgelik toı» baıqaýy

Aqtóbe qalasynda ótken bas júldesi 1 mıllıon teńgeni quraıtyn bul baıqaýǵa jýyrda shańyraq kótergeli otyrǵan bes jup qatysty. Qalalyq ákimdiktiń qoldaýymen uıymdastyrylǵan erekshe baıqaý Qazaqstan Respýblıkasy Konstıtýsııasynyń 20 jyldyǵyna oraılastyrylyp ótkizildi. Baıqaýdyń maqsaty jastardy otansúıgishtikke, otbasylyq yntymaqqa, birlikke tárbıeleý bolyp tabylady. Sharany uıymdastyrýshylardyń bi­ri, «Shańyraq sentr» toı uıym­dastyrý ortalyǵynyń bas dırektory Áıgerim Galkıeva bul bastamanyń aqtóbelik qyz-jigitterdiń qoǵamdyq is-shara­larǵa belsendirek qatysýyna yqpal etetinin aıtady. Baıqaýǵa otbasylyq ómirge qadam basyp otyrǵan juptar Erlan Qaldybekov pen Albına Ibraımhanova, Abylaı Naýryzbaev pen Áıgerim Ulmaǵanbetova, Mahabbat Amı­rın men Gúlnur Jumaǵalıeva, Qýandyq Tórebekov pen Alına Ǵabdýalıeva, Talǵat Salenov pen Ahman Bısenbaeva qatysty. Saıys eki jastyń qalaı tanys­qany týraly baıandaıtyn «Love story» beınebaıandy tamashalaý­dan bas­taldy. Baıqaý sharttary boıyn­sha qalyńdyqtar men kúıeý jigitter tamaq daıyndaýdan sheberlikterin kórsetti. Saıystyń «Maǵan turmysqa shyqshy?» dep atalatyn aqyrǵy shartynda jigitter qyzdarǵa júrekjardy usynystaryn jasap, júzikterin usyndy. Qala ákiminiń orynbasary Aıgúl Arynǵazıeva bastaǵan qazylar alqasy basty syılyqtyń ıelerin anyqtap, qalǵandaryn da baǵaly syılyqtarmen marapattady. Baıqaýdyń 1 mıllıon teńgelik bas júldesin Talǵat pen Ahman ıelendi. Túrkııaǵa eki kisilik tegin joldama Mahabbat pen Gúlnurǵa buıyrdy. Al «Shanti Spa» saýyqtyrý ortalyǵyna barýǵa múmkindik beretin 55 myń teńgelik sertıfıkatty Qýandyq pen Alına ıelense, «Assortı» meıramhanasynda keshki as ishýge múmkindik beretin 30 myń teńgeniń sertıfıkatyn Erlan men Albına aldy. Abylaı men Áıgerimge «Love story» beınebaıanyn tegin túsirý sertıfıkaty tabys etilip, sýretteri «Vasha svadba» jýrnalynda jarııalanatyn boldy. Merekelik keshti qorytyndylaǵan qala ákiminiń orynbasary Aıgúl Arynǵazıeva Qazaqstan boıynsha mundaı kúıeý jigitter men qalyńdyqtardyń jarysy áli ótpegendigin, bul baıqaýdyń bolashaqta dástúrli túrde ótkiziletin jetkizdi. Baıqaýǵa «Svetlana» týrıstik fırmasy, jastarǵa arnalǵan aqparatty-jarnamalyq «Vasha svadba» jýrnaly, «Mega Aqtóbe» saýda oıyn-saýyq ortalyǵy demeýshilik qoldaý kórsetti. Satybaldy SÁÝIRBAI, «Egemen Qazaqstan». AQTО́BE.