5,6 mıllıard teńge ınvestısııalyq qarajatty ıgerýdiń arqasynda jalpy qýattylyq 63 MVt-ǵa kóbeıdi
«SevKazEnergo» AQ oblystyń 2,2 myń bıýdjettik, ónerkásip, kommersııalyq uıymdary men 580 myń turǵynyn elektr qýatymen jabdyqtaıdy. Búginde elektr jelileriniń uzyndyǵy 135 myń shaqyrymdy, jylý qubyrlary 233 shaqyrymdy quraıdy. Jalpy elektr qýattylyǵy 455 MVt-ǵa, al jylý energııasy 791,65 Gkal/saǵatqa teń. Kompanııa tozyǵy jetken qondyrǵylar men qural-jabdyqtardy qalpyna keltirýge qomaqty qarjy quıyp keledi. Oǵan qarasty № 2 Petropavl jylý-elektr ortalyǵy qysqy maýsymǵa ázirlik qarsańynda Reseıden jetkizilgen jańa qubyr agregatyn qurastyryp, iske qosty. Jarty ǵasyrdan astam úzdiksiz jumys istep kelgen nysandy qaıtadan turǵyzýǵa 5,6 mıllıard teńge ınvestısııa tartyldy. Elektr qýattylyǵy 63 MVt-ǵa deıin ulǵaıtylyp, jylyna 40 myń tonnadaı kómirdi únemdeýge múmkindik berdi.
– Indýstrııalyq-ınnovasııalyq qýatty jobalar aıasynda kóptegen áleýmettik nysandar, turǵyn úıler turǵyzylýda. Olardy qosymsha jylý jáne elektr qýatymen qamtý úshin stansada qosymsha rezervtiń paıdalanýǵa berilip otyrǵanyn aıtýly oqıǵaǵa balaýǵa bolady. О́ńirde qytymyr qystan qysylmaı shyǵýdyń barlyq joldary qarastyrylǵan. Qazir kópqabatty turǵyn úılerdiń 92 paıyzǵa jýyǵy jaýapty maýsymǵa tas túıin daıyndyqtary týraly qujattaryn aldy, – dedi saltanatty jıynda sóılegen sózinde aımaq basshysy Erik Sultanov.
Munyń aldynda osynda № 4 týrbına jańartylǵan bolatyn. Alda № 7 qubyr agregaty men № 6 bý qazandyǵy óz kezegin kútip tur. JEO-nyń dırektory Vıktor Barmınniń aıtýyna qaraǵanda, jańa aktıvterdi qurýǵa, tehnıkalyq qaıta jaraqtandyrýǵa, óndiris oryndaryn keńeıtýge 34,5 mıllıard teńge qarajat baǵyttalǵan. Sóıtip, 2020 jylǵa deıin qubyr sehyndaǵy qural-jabdyqtardyń 72 paıyzyn, qazandyq sehynyń jartysynan astamyn almastyrý josparlanǵan. Olarǵa ozyq úlgidegi avtomattandyrylǵan tehnologııalyq basqarý júıesi engiziletin bolady.
Jańa qubyr agregatyn óndiriske engizý stansanyń jumys tıimdiligin arttyryp, ekologııalyq qaýipsizdigin qamtamasyz etip, qural-jabdyqtardyń tozýyn 14 paıyzǵa azaıtty.
О́mir ESQALI,
«Egemen Qazaqstan».
Soltústik Qazaqstan oblysy.
Sýretterdi túsirgen
Amangeldi BEKMURATOV.
