Elbasy Konstıtýsııasynyń 20 jyldyǵyna arnalǵan konferensııaǵa qatysty

ASTANA. 28 tamyz. Prezıdent Qazaqstan Respýblıkasy Konstıtýsııasynyń 20 jyldyǵyna arnalǵan «Konstıtýsııa: birlik, turaqtylyq, órkendeý» atty halyqaralyq ǵylymı-tájirıbelik konferensııaǵa qatysty. Bul týraly akorda.kz habarlady. Konferensııa jumysyna Úkimet músheleri, Parlament palatalarynyń tóraǵalary men depýtattary, Konstıtýsııalyq Keńes tóraǵasy men músheleri, bedeldi halyqaralyq uıymdar delegasııalary, sondaı-aq 28 eldiń quqyq qorǵaý mekemeleri men prokýratýralarynyń, sottarynyń, konstıtýsııalyq baqylaý organdarynyń basshylary, otandyq jáne sheteldik tanymal zańger-ǵalymdar, saıasattanýshylar men sarapshylar qatysty. Memleket basshysy konferensııaǵa qatysýshylarǵa arnaǵan sózinde 1995 jylǵy 30 tamyzda Konstıtýsııa jónindegi referendýmda birden-bir durys jol tańdalǵanyn atap ótti. «Eger bizdiń memleket qurý jolyndaǵy qadamdarymyz asyǵys, saıası turǵydan abstraktili jobalarǵa negizdeletin bolsa, onda sátsizdikke ushyraıtynymyz anyq edi. Onyń zalaly orasan bolar edi. Biz memleket qurý asa jaýapty, kúrdeli, uzaq ári shetin úderis ekenin kóptegen táýelsiz jańa memleketterdiń tájirıbesinen, keıde asa ókinishti mysaldarynan bilemiz. Memleket qurý qatań keste nemese ýtopııalyq josparlar negizinde júzege asyrylýy múmkin emes. Ekonomıkalyq progress jáne halyq baqýattylyǵy bolmaıynsha ornyqty turaqtylyq bolmaıdy. Al eldegi turaqtylyqsyz tabysty ózgerister jasaý múmkindigi de qalmas edi», – dedi Qazaqstan Prezıdenti. Nursultan Nazarbaev elimiz Konstıtýsııa erejelerin basshylyqqa ala otyryp, nebári eki onjyldyqta úlken joldy júrip ótkenin aıtty. «Qazaqstan – búginde ábden qalyptasqan, álemniń abyroıly jáne laıyqty memleketi. Bul – bizdiń Negizgi Zańymyzdyń barlyq erejeleri men qaǵıdattarynyń naqty is júzine asýy. Jaqsy jaǵyna qaraı ózgerýge beıim turatyn memlekettik jáne qoǵamdyq qurylys qana tıimdi bolyp sanalady. Bizdiń Ata Zańymyzda tabysty damý úshin de, Ulttyń ózin-ózi jańǵyrtýy úshin de qajetti barlyq quqyqtyq tetikter bar. Biz 2050 jylǵa deıingi strategııalyq baǵdarlamamyzdyń negizinde aldymyzǵa Qazaqstandy álemdegi eń damyǵan 30 eldiń birine aınaldyrý jóninde jahandyq maqsat qoıdyq», – dedi Elbasy. Sonymen qatar, Memleket basshysy konferensııaǵa qatysýshylardyń jumystary jemisti jáne tabysty bolýyna tilektestik bildirdi. Is-shara barysynda Eýropa keńesi Venesııa komıssııasynyń vıse-prezıdenti E.Tanchev, Eýrazııalyq ekonomıkalyq odaq sotynyń tóraǵasy, Armenııa Respýblıkasynyń Konstıtýsııalyq sotynyń tóraǵasy, Jańa demokratııa elderi konstıtýsııalyq baqylaý organdary konferensııasynyń tóraǵasy G.Arýtıýnıan sóz sóıledi. Konferensııaǵa qatysýshylar konstıtýsııalyq qurylystaǵy Qazaqstannyń tájirıbesine joǵary baǵa berip, eldiń konstıtýsııalyq turǵydan damýyndaǵy Nursultan Nazarbaevtyń atqarǵan róli aıryqsha ekenin atap ótti. Sheteldik qonaqtar Qazaqstannyń qoǵamdyq-saıası turaqtylyqty saqtaýdaǵy, etnosaralyq jáne dinaralyq kelisimdi qamtamasyz etýdegi tabystaryn, sondaı-aq demokratııalandyrý jáne yryqtandyrý úderisindegi ornyqtylyq pen júıelilikti atap kórsetti. Aıdar О́risbaev. Derek, sýret: akorda.kz.