ASTANA. 12 naýryz. Endi birer saǵattan keıin bastalatyn Chempıondar lıgasynyń 1/8 fınalyndaǵy eki oıynnyń biri Mıýnhenniń «Bavarııasy» men Doneskiniń «Shahteri» arasynda ótedi. Bul týraly egemen.kz habarlady.
Ýkraınada ótken alǵashqy oıynda esep ashylǵan joq. Ataǵynan at úrketin «Bavarııamen» teń oınaýdyń ózi kez kelgen komanda úshin úlken jetistik. Al Evropada ortańqol ujym sanalatyn «Shahter» úshin bul jeńispen teń desek, artyq emes. Endi eki komandanyń keıbir statıstıkalyq kórsetkishterine nazar aýdaraıyq.
- «Shahter» úshin nemis komandalary eń qolaısyz qarsylas bolyp sanalady. Ásirese, Chempıondar lıgasynda germanııalyqtarǵa esesi ketip júr. Sebebi, osyǵan deıingi oıyndarda «kenshiler» jeńiske jetip kórmegen. Ázirge týrnır aıasynda ýkraınder 7 márte germanııalyq komandalarmen kúsh synasty. Sonyń tórteýinde jeńilse, úsheýinde teń tarqasqan. Teń oıynnyń sońǵysy qashan tirkelgenin joǵaryda aıttyq.
- «Bavarııa» sońǵy 18 jylda 17 ret Chempıondar lıgasynyń pleı-off kezeńine shyǵyp otyr. Tek 2002-2003 jylǵy maýsymda mıýnhendikter óz tobynda sońǵy oryn alyp, jarysty erte aıaqtaǵan edi.
- Nemis komandasynyń shabýylshysy Tomas Mıýller osy týrnırde 24 gol soǵyp úlgergen. 25 jastaǵy fýtbolshy úshin bul jaman nátıje emes. Mıýllerdiń atalǵan saıysqa 2009 jyldan beri qatysyp kele jatqanyn aıta keteıik. Sondaı-aq, bul kórsetkish boıynsha Tomas «Bavarııanyń» tarıhynda Chempıondar lıgasynda eń kóp gol soqqan oıynshy retinde jazýly tur.
- «Bavarııa» osy týrnır aıasynda Ýkraına komandalarymen 11 ret synǵa túsken. Onyń bireýi «Shahtermen» ekeni belgili. Al qalǵan 10 oıyndy Kıevtiń «Dınamosyna» qarsy ótkizgen.
- «Shahter» sapynda negizinen brazılııalyq fýtbolshylar oınaıtyny belgili. Komandanyń joǵary jetistikterge jetýine de sol oıynshylardyń kóp septigi tııýde. Búginge deıin Chempıondar lıgasynda «Shahterdiń» brazılııalyq oıynshylary 64 gol soqqan eken. Bul kórsetkish boıynsha Ýkraına komandasy tek «Barselonaǵa» jol beredi. Sebebi, ıspanııalyq komandanyń namysyn qorǵaǵan brazılııalyqtar bul saıysta 67 márte mergendigimen kózge túsken.
Komandalar myna quramda alańǵa shyǵýy múmkin.
