Keshe «Qazaqstan-2050» Jalpyulttyq qozǵalysy keńesiniń beldi músheleri jýrnalıstermen baspasóz máslıhatyn ótkizip, «Nur Otan» partııasy Qazaqstan Respýblıkasy prezıdenttigine kandıdat retinde usynyp otyrǵan Memleket basshysy Nursultan Nazarbaevqa qoldaý bildiretindikterin málimdedi. Baspasóz máslıhatyna atalǵan qozǵalys keńesiniń tóraǵasy Danat Jýmın, músheleri Ǵanı Nyǵmetov pen Tımýr Ilııasov qatysty.
Málimdemeni qozǵalys keńesiniń tóraǵasy Danat Jýmın oqyp berdi.
«Biz, «Qazaqstan-2050» Jalpyulttyq qozǵalysyna qatysýshylar Memleket basshysy Nursultan Nazarbaevty Qazaqstan Respýblıkasy prezıdenttigine kandıdat retinde usyný týraly sezd sheshimine biraýyzdan qoldaý bildiremiz.
Bizdiń elimizdiń Kóshbasshysynyń jemisti jumystarynyń nátıjesinde beıbitshilik pen kelisim Qazaqstannyń HHI ǵasyrdaǵy damýynyń senimdi biriktirýshi platformasyna aınaldy. Bizdiń úlken de naqty mindetimiz – «Qazaqstan-2050» Strategııasyn júzege asyryp, álemniń eń damyǵan otyz eliniń qataryna qosylý.
Bizdiń aldymyzdaǵy naqty maqsat – «Nurly Jol» Jańa Ekonomıkalyq Saıasatyn tabysty júrgize otyryp, tehnologııalyq serpindi qadam jasaýymyzǵa múmkindik beretin ındýstrııalyq-ınnovasııalyq bazany qurý, sóıtip, azamattarymyzdyń ál-aýqatyn kóterý.
Bizdiń «Qazaqstan-2050» Strategııasyn júzege asyrýda qazirdiń ózinde naqty nátıjelerimiz bar. Olar – elimizdiń barlyq óńirlerinde salynǵan júzdegen zaýyttar, kásiporyndar, ónerkásiptik keshender. Olar paıdalanýǵa berilgen júzdegen balalar baqshalary, mektepter men aýrýhanalar. Olar – iske qosylǵan myńdaǵan shaqyrymdyq avtokólik dálizderi men temirjoldar. Olar – qarqyndy júzege asyrylý ústinde mıllıondaǵan sharshy metrlik áleýmettik turǵyn úıler. Olar – on jeti mıllıon adamdy qurap otyrǵan qazaqstandyqtardyń árbirine jasalý ústindegi ómir men eńbek úshin qajetti qolaıly jaǵdaılar.
«Qazastan-2050» Strategııasyn júzege asyrý ár jyl, ár kún saıyn qazaqstandyqtardyń birligin nyǵaıtyp, turmysyn jaqsartady. Bizdiń azamattarymyzdyń barlyq sanattaryn jańa jumys oryndarymen jáne áleýmettik kepildiktermen qamtamasyz etedi.
«Qazaqstan-2050» Jalpyulttyq qozǵalysynyń barlyq qatysýshylary atynan Memleket basshysy Nursultan Nazarbaevty Qazaqstan Respýblıkasy prezıdenttigine kandıdattyqqa usyný týraly sheshimdi naqty da shynaıy túrde qoldaımyz», delingen bul málimdemede.
Málimdeme oqylyp bitken soń, jýrnalıster suraqtar qoıdy. «Qazaqstan-2050» Jalpyulttyq qozǵalysy qandaı istermen shuǵyldanady? Qozǵalystyń aldyna qoıǵan maqsaty ne? Qazaqstan Respýblıkasy prezıdenttigine kandıdat retinde usynylyp otyrǵan Memleket basshysy Nursultan Nazarbaevtyń kandıdatýrasyn ne úshin qoldaıdy? Qozǵalys basshylaryna mine osyndaı suraqtar qoıyldy.
– «Qazaqstan-2050» Jalpyulttyq qozǵalysynyń músheleri – «Bolashaq» baǵdarlamasynyń túlekteri. 2013 jyldyń qarasha aıynda Memleket basshysynyń shetelderden oqý bitirip kelgen jastarmen kezdesip, keń kólemde áńgime ótkizgen bolatyn. Sonda Elbasy jastarǵa ózderiniń alǵan sapaly bilimin iske jaratyp, elimizge kómektesý úshin bir jaǵadan bas, bir jeńnen qol shyǵarýǵa múmkindik beretin bir qoǵamdyq uıymǵa birigý jóninde keńes bergen bolatyn. Elbasynyń bul keńesi bizge úlken oı saldy. Sóıtip, jastar, bizder aqyldasa kelip, osy qozǵalysty qurdyq. Qurylǵan kezde jıyrmaǵa jýyq qana múshemiz bolsa, qazir onyń sany alty myńdy qurap otyr. Biz ózimizdiń aldymyzǵa negizgi maqsat retinde elimizdiń álemniń eń damyǵan otyz eliniń qataryna qosylýyna alǵan bilimimiz, ómirde jınaǵan tájirıbemiz arqyly kómek kórsetýdi aldyq. Osylaısha, jastardyń basyn biriktirdik. Qoǵam áli kúnge deıin qoǵamdyq negizde jumys istep keledi. О́ıtkeni, «Bolashaq» baǵdarlamasyn bitirýshilerdiń bári alǵa umtylýda. Olar memlekettik qurylymdarda, úlken kompanııalarda jumys isteıdi. Endi biri alǵan bilimin paıdalanyp, óz bıznesin uıymdastyryp otyr. Al endi istegen sharýamyzǵa kelsek, ol az emes. Jasap jatqan jumystarymyz qolymyzdan kelgen múmkindikke baılanysty, árqıly. Máselen, myna meniń qasymda otyrǵan Tımýrdyń óz bıznesi bar. Ol óziniń ósken jeri Stepnogorskige barǵanda mynadaı jaǵdaıǵa tap bolǵan. Tımýrmen áńgimelesýge kelgen otyz shaqty adamnyń kópshiligi jumysynyń joqtyǵyn aıtyp, Reseıge kóshýdi jón sanap otyrǵandyǵyn bildiredi. Áńgimelese kele, sol otyz adamnyń jıyrma besi irgede turǵan Astanada bolmaǵandyǵy anyqtalady. Tımýr jańaǵy jerde dereý avtobýs uıymdastyryp, jerlesterin Astanaǵa alyp kelip aralatady. Olar óz tańdanystaryn jasyrmaıdy. Bul kisiler elimiz munshama damyp ketti dep oılamaǵan eken. Odan keıin Tımýr álgi adamdardy óziniń shetelden kelgen jumys istep jatqan nemis jáne amerıkalyq dosymen tanystyrady. Olar sheteldik damyǵan memleketterdiń azamattary bola tura jumys isteý úshin Qazaqstandy qalaǵan. Sebebi, munda isteı bilseń, jumys kóp. Jáne tabys ta jaman emes. Osyny estigen Tımýrdyń jerlesteri oılana kele ózderiniń Reseıge kóshpek nıetterinen bas tartady.
Mine, bizdiń volonterlik negizdegi atqaryp jatqan jumystarymyz óte kóp. Biz ony aıtyp maqtana bermeımiz. Al biz Nursultan Nazarbaevty nege qoldaımyz? Sebebi, talantty jastardyń shetelderde oqyp, bilim alýyna jol ashqan Elbasymyzdyń ózi emes pe? Máselen, men eshqandaı qoldaýy joq aýyl balasymyn. Mektep bitirgen kezde, joǵary oqý ornyna túsetindeı qarjym da bolǵan joq. Biraq maǵan osy kezde memlekettiń joǵary oqý oryndarynda oqý úshin bóletin granty kómekke kelip, men osy granttyń arqasynda Eýrazııa ulttyq ýnıversıtetin bitirip shyqtym. Sodan keıin «Bolashaq» baǵdarlamasymen shetelde tegin oqý múmkindigine ıe boldym. Qysqasy, memlekettiń arqasynda oqyp jetildim. Qazir jasym otyz ekide. Úsh balam bar. О́zimniń bıznesimdi ashyp, tirshilik quryp jatyrmyn. Endeshe, maǵan nege Elbasynyń kandıdatýrasyn qoldamasqa?! Men sol kisiniń júrgizgen saıasatynyń arqasynda dúnıege kózimdi keń ashatyndaı múmkindikke ıe bolyp otyrǵanym joq pa? Al bolashaqtyqtardyń arasynda mendeıler óte kóp, – dep jaýap berdi jýrnalıster suraǵyna Danat Jýmın.
Ǵanı Nyǵmetov te óz ómirinen osyndaı mysaldar keltirdi. Sonymen qatar, ol «Bolashaq» baǵdarlamasy túlekteriniń barlyǵy da ózderiniń eli men jerin súıetin patrıottar ekendigin, sondyqtan osyndaı qozǵalysqa biraýyzdan birigip, kóptegen jumystardy júrgizip jatqandyǵyn, olardyń barlyǵy Elbasymyzdy barynsha qurmetteıtindigin jetkizdi.
Aqjarylqap kóńildi, izgi nıetti jastardyń sózine biz de súısindik.
Suńǵat ÁLIPBAI,
«Egemen Qazaqstan».
