Foto: JUNG YEON-JE/Pool via REUTERS
Seýlde ótken sot otyrysynda apellıasııalyq alqa Kımniń az saýdalanatyn aksııalardyń baǵasyn birneshe treıdermen birge jasandy túrde ósirýge qatysqanyn anyqtady. Osylaısha, tómengi sottyń ony bul aıyp boıynsha aqtaǵan sheshimi kúshin joıdy.
Sondaı-aq sot Kımniń dinı uıymnan jalpy quny shamamen 80 mln von (54 257 dollar) bolatyn eki Chanel sómkesi men Graff alqasyn qabyldaǵanyn dáleldedi. Tergeý dereginshe, shirkeý bul syılyqtardy sheteldegi bıznesine saıası qoldaý alý maqsatynda usynǵan.
Sot tóraǵasy úkimdi jarııalaı otyryp: «Kım birinshi hanym retindegi yqpalyn paıdalanyp, para aldy. Ol memlekettik basqarýdyń ashyqtyǵyna degen senimdi álsiretip, qoǵamda jik týdyrdy», dedi.
Sonymen qatar sot 70 mln von aıyppul salyp, alqany tárkileý týraly sheshim shyǵardy.
Aıta keteıik, Kım buǵan deıin qańtar aıynda para alý boıynsha 20 aıǵa sottalǵan, alaıda ózge aıyptardan aqtalǵan edi. Apellıasııalyq sot onyń saılaý zańyn buzbaǵany týraly sheshimdi ózgerissiz qaldyrdy.
Kım 2024 jylǵy tamyzdan beri qamaýda otyr. Ol ózine taǵylǵan aıyptardyń barlyǵyn joqqa shyǵaryp, advokattary bul úkimge Joǵarǵy sotqa shaǵym túsiretinin málimdedi.
Ońtústik Koreıanyń eks-prezıdenti ómir boıyna bas bostandyǵynan aıyryldy
Bul is burynǵy prezıdent Iýn Sok Ioldiń 2024 jyly qysqa merzimge áskerı jaǵdaı engizýinen keıin týyndaǵan janjaldarmen baılanysty. Bılikten shettetilgen Iýn bıyl aqpanda búlik uıymdastyrdy degen aıyppen ómir boıyna bas bostandyǵynan aıyrylǵan. Onyń birneshe serigi de sot aldynda jaýap berip jatyr. Al burynǵy premer-mınıstr Han Dok Sý Iýnnyń josparyna kóz juma qarady dep tanylyp, 23 jylǵa sottaldy.
