Pavlodarlyq stýdent býkmekerlik keńselerde 10 mln. teńge utylyp qaldy

PAVLODAR. 12 naýryz. Artýr esimdi 21 jasar stýdent býkmekerlik keńselerde 10 mln teńgege jýyq aqsha utylyp, narkodıspanserdiń dárigerlerine habarlasty. Bul týraly egemen.kz tilshisi habarlady. Artýr oqýshy kezinen bastap aqshanyń býyna túsip, býkmekerlik keńselerge bara bastaǵan eken. Sodan keıin qyzyl aqshaǵa qyzyqqan bala býkmekerlik keńselerden shyqpaı, kádimgi azart oıynshyǵa aınala bastaǵan. «Alǵashqy kezde kóp aqsha utyp alatynmyn. Bul jaǵdaı kópke deıin sozylmady. Birte-birte utyla bastap, qaryzǵa batyp kettim. Sony óteý úshin taǵy da qaryz alyp, tólep turdym. Eń jamany, keı-kezde qaryzdy óteý úshin urlyqpen de aınalysa bastadym. Biraq eshkimge eshteńe bildirtpedim. Meniń qaryzdarym 100 000-nan 200 000 teńgege deıin jetken kezder boldy. Qaryzdarymdy áke-sheshem tólep turdy. Sol úshin olardan talaı ret sóz estidim. Áke-sheshemniń maǵan osyny qoıshy dep jylap, ótingenin esime túsirgende óz ishime ózim syımaı ketemin. Men bári ýaqytsha, bárin qoıa alamyn dep oıladym», deıdi Artýr. Alaıda bári Artýr oılaǵandaı bolmaı shyqty. Ol mektepti bitirgen soń, Pavlodardan ketip, Reseıdiń bir joǵary oqý ornyna oqýǵa túsedi. Sol jerde de «eski áni» taǵy bastalady. Endi ol býkmekerlik keńselerge 1 000 teńge emes, 1 000 rýblden bastap aqsha qoıa bastaıdy. Sóıtip júrgende Reseıdiń keńselerine teńgemen eseptegende jarty mıllıondaı teńge qaryz bolyp, ne isterin bilmeı qalady. Keńseniń adamdary Artýrǵa aqshany qaıtarmasań seni, senimen qosa týǵan-týystaryńnyń báriniń kózin joıyp jiberemiz dep qorqytady. Sodan ne kerek, Artýr Pavlodardaǵy ata-anasyna habarlasyp, jaǵdaıyn aıtady. Bala úshin áke-sheshesi ne istemeıdi deısiz? Taǵy da ata-anasy balasynyń qaryzyn tólep, elge qaıtaryp alady. Olar Artýrdy narkologııalyq dıspanserge jatqyzady. Qazir ol dıspanserde «oıyn azarty batpaǵynan» shyǵý úshin emdelip jatyr. Dárigerderdiń aıtýynsha, Artýr bir aıdan astam ýaqyt emdelýde. Alǵashqy kezde jas jigittiń jaǵdaıy alańdatarlyq bolsa, qazir uıqysy tynysh, burynǵy sımptomdarynyń bárinen qulan-taza aıyqqan. Dastan Kenjalın. Derek: egemen.kz Sýret:  egemen.kz