Astana men Aqtóbede ótken semınarlar

Keshe Astana men Aqtóbe qalalarynda saılaý uıym­das­ty­rýshylarmen jáne saılaý prosesine qatysýshylarmen «2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýyn uıymdastyrý men ótkizý» atty taqyrypta semınarlar ótti. Astanadaǵy semınardy Qazaqstan Respýblıkasy Ortalyq saılaý komıssııasy men Astana qalasynyń aýmaqtyq saılaý komıssııasy uıymdastyrdy. Oǵan Ortalyq saılaý komıssııasy tóraǵasynyń orynbasary V.K. Foos, Ortalyq saılaý komıssııasynyń múshesi T.V.Ohlopkova jáne Ortalyq saılaý komıssııasynyń apparaty qarjy-baqylaý bóliminiń meńgerýshisi M.B. Muhametova, TMD-dan Baıqaýshylar mıssııasy shtabynyń jetekshisi E.A.Sloboda, EQYU/DIAQB Mıssııasynyń saılaý máseleleri jónindegi mamany Lýsıan Raýl Mýreshan, Saılaýdy baıqaý jónindegi respýblıkalyq qoǵamdyq komıssııanyń ókili N.K.Tileýkenov qatysty. Al Aqtóbede Batys Qazaqstan, Atyraý, Mańǵystaý jáne Aqtóbe oblystarynyń aýmaqtyq jáne ýchaskelik saılaý komıssııalarynyń múshelerimen bolǵan semınardyń jumysyna Qazaqstan Respýblıkasy Ortalyq saılaý komıssııasynyń múshesi L.J.Súleımen, sondaı-aq, EQYU/DIAQB Mıssııasynyń baıqaýshylary Robert Harlı Brandstetter men Helena Marııa-Terttý Laatıo qatysty. Atalǵan is-sharalarǵa qatysýshylar retinde, sondaı-aq, saıası partııalar men qoǵamdyq birlestikterdiń ókilderi, Qazaqstan Respýblıkasynyń prezıdenttigine kandıdattardyń senim bildirilgen adamdary, baıqaýshylar, buqaralyq aqparat quraldary men Qazaqstan Respýblıkasynyń múddeli memlekettik organdarynyń ókilderi shaqyryldy. Semınarlar sheńberinde saılaý naýqanyn qarjylyq, materıaldyq-tehnıkalyq, uıymdastyrýshylyq jáne aqparattyq qamtamasyz etýge qatysty máseleler, sonymen qatar, saılaý komıssııalarynyń, jergilikti atqarýshy organdardyń, úkimettik emes uıymdardyń, baıqaýshylardyń, azamattyq qoǵam ınstıtýttary men buqaralyq aqparat quraldarynyń ózara is-áreketiniń tıimdiligin arttyrýdyń túrleri men ádisteri talqylandy. Birlesken jumystyń mańyzdy baǵyttarynyń biri retinde saılaý prosesine qatysýshylardyń báriniń saılaý zańnamasy normalarynyń buljytpaı saqtalýyn qamtamasyz etý qajettigi atap ótildi. Pikirtalas barysynda saılaý prosesin quqyqtyq jáne qujattamalyq qamtamasyz etý, saılaýshylardyń tizimderin túzetý boıynsha jumysty uıymdastyrý, saılaýdy aqparattyq súıemeldeý, saılaýaldy úgitti júrgizý jáne daýys berý kúnine daıyndyq máseleleri asa qyzyǵýshylyq týdyrdy. Ortsaılaýkom músheleri quqyq qoldaný tájirıbesiniń ózekti máseleleri jóninde birqatar túsindirmeler berdi. Saılaý ýchaskelerinde daýys berýdi uıymdastyrýdyń rásimdik máselelerine jáne daýys berý kúni ýchaskelik saılaý komıssııalarynyń is-áreketterine erekshe kóńil bólindi. О́z tarapynan aýmaqtyq jáne ýchaskelik saılaý komıssııalarynyń músheleri jumys tájirıbesimen bólisip, semınarda talqylanǵan taqyryptar jóninde pikir almasty. «Egemen-aqparat».