Birqatar elder Iranmen elshilik qatynasty úzdi

ASTANA. 5 qańtar. Saýd Arabııasy syrtqy ister mınıstri Iranmen dıplomatııalyq qatynastyń úzilgeni týraly málimdeme jasaǵannan keıin onyń sońynan birneshe el sondaı qadamǵa bardy. Bul týraly ras.kz habarlady. Er-Rııad pen Tegeran arasyndaǵy janjal 2 qańtar kúni Saýd Arabııasynda terrorızmge qatysy bar degen aıyppen 47 adamnyń ólim jazasyna kesilgeninen keıin týdy. Jazaǵa tartylǵandar arasynda belgili shııt ýaǵyzshysy Nımr an-Nımr de boldy. Osynyń artynsha resmı Tegeran ókilderi tarapynan Saýdııa bıliginiń áreketin aıyptaǵan óte qatqyl málimdemeler jasaldy. Qańtardyń 3-inde kúni boıy Iran astanasynda sherýler ótip, jergilikti shııtter Saýdııa bıliginiń áreketine qarsylyq bildirdi. Sonyń ishinde 400-ge jýyq adam Saýd Arabııasy elshiligi ǵımaraty aldyna jınalyp: «Ál-Saýdqa (Salman ıbn Abdýl-Azız ál-Saýd – Saýd Arabııasynyń koroli – red. eskertpesi) ólim kelsin!» dep aıqaılap turyp aldy. Sol kúni keshke Saýd Arabııasy syrtqy ister mınıstri Ádıl ál-Djýbeır «koroldiktiń ishki isterine ashyqtan-ashyq aralasqany, aımaqta dushpandyq is-áreketter jasaǵany jáne koroldiktiń Tegerandaǵy elshiligi men Meshhed qalasyndaǵy konsýldigine shabýyl jasalǵany úshin» Iranmen dıplomatııalyq qatynastyń úziletini týraly málimdeme jasady. Er-Rııadqa yntymaqtastyq retinde 4 qańtar kúni Bahreın de Iranmen elshiliktiń toqtatylatynyn málimdedi. Budan basqa, Afrıkadaǵy Sýdan memleketi de parsy memleketimen baılanysty úzetinin jetkizdi. Talǵat Raıymbek. Derek, sýret: ras.kz.