Atyraýda boran kúni adasqan shopandy qoılar qutqaryp qaldy

ASTANA. 6 qańtar. Atyraý oblysynyń Inder aýdany, Eltaı aýyldyq okrýgine qarasty «Baıboz» qystaǵynyń shopany qoılaryn jaıý úshin dalaǵa shyǵyp, borandy kúni adasyp ketken. Bul týraly ras.kz saıtyna silteme jasaǵan egemen.kz tilshisi habarlady. Oqıǵa 2 qańtar kúni bolǵan. Alǵashynda kún ashyq bolyp, malshy esh ýaıymsyz qoılaryn qoradan shyǵarady. Alaıda, aıaq astynan aýa raıy buzylyp, boran soǵa bastaıdy. Sol kezde shopandy izdeý jumystary da qolǵa alynady. Malshy kelesi kúni aman-esen tabylǵan. Ol sýyqta otardyń ortasyna kirip, qoılardyń dene jylýymen jylynǵan eken. Sonymen qatar, dál sol kúni Kóktoǵaı aýyldyq okrýgine qarasty «Sartebin» qystaǵynan keshki 6-lar shamasynda «Nıva» avtokóligimen shyqqan malshynyń joǵalǵany belgili boldy. «Bizge malshynyń qystaqtan jumystarymen 55 shaqyrym jerdegi Kóktoǵaı aýylyna shyqqany jáne qaıta oralmaǵany týraly habarlama kelip tústi. Sol kúni tolassyz qar jaýyp, sońy boranǵa ulasqan edi. Biz aýdannyń tótenshe jaǵdaılar qyzmetiniń mamandarymen birlesip izdeý jumystaryna kiristik. Oǵan arnaıy tehnıkalar jumyldyryldy jáne aýyl turǵyndary da qol ushtaryn sozdy. Joǵalǵan malshy 3 qańtar kúni, ıaǵnı, 11 saǵattan keıin tabyldy. Ol kóligimen kúrtik qarǵa maltyǵyp qalǵan. Biz der kezinde bardyq. Sebebi, malshyny tapqan kezde kóliktegi janarmaı da taýsylýǵa jaqyndaǵan», – deıdi Kóktoǵaı aýyldyq okrýginiń ákimi Mámbetqalı Qusaıynov. Elaman Qońyr. Derek: ras.kz. Sýret: azh.kz.