Qarýly Kúshterde kádege jaratylatyn oq-dárilerdiń sany artýda

ASTANA. 11 qańtar. 2015 jyly Qazaqstan Respýblıkasy Qarýly Kúshterinde memlekettik qorǵanys tapsyrysy sheńberinde 160 myńnan asa artıllerııalyq oq-dáriler, 260 myńǵa jýyq qol granatalary jáne 10 myńnan asa ınjenerlik oq-dáriler kádege jaratyldy. Bul týraly egemen.kz tilshisi habarlady. Oq-dárilerdi paıdaǵa asyrý úderisi kádege jaratýdyń eki ýchaskesinde Arys qalasy men Otar stansııasynda júrgiziledi. Ol jerde arnaıy jabdyq, onyń ishinde modýlder bar. «Jabdyqtyń osy túrlerinde oq-dárilerdi bólshekteý, porohtardy ajyratý, trotıldy qorytý, ıakı, oq-dárilerdi alýdan bastap tolyq bólshektegenge deıin jáne ári qaraı iske asyrylatyn kádege jaratylatyn ónimder alýǵa deıin júrgiziledi jáne qarjy memleket bıýdjetiniń kirisine túsedi.  Saqtalýy boıynsha merzimi ótip ketken oq-dáriler tıisti sanatqa aýystyrylady jáne pýnktterimizde kádege jaratylady. Olardyń arasynda 40-shy jyldardyń sońyndaǵy, 50 – 60-shy jyldardaǵy oq-dáriler de bar», dedi «Qaztehnologııa» AQ kádege jaratý departamentiniń dırektory Erbol Álibekov. Kádege jaratý ári qaraı qara jáne túrli-tústi súımen retinde iske asyrylýy múmkin materıaldardy bólshekteý jáne alý ádisimen júrgiziledi. Poroh pen trotıl – jarylǵysh zattar bólek iske asyrylady. Mamandardyń aıtýynsha, statıstıka boıynsha kádege jaratylatyn oq-dárilerdiń sany jyl saıyn arta túsýde. Tehnıka qaýipsizdigin saqtaý men jetildirýge de asa mán berilýde. «Biz tehnologııany ózgertip, ony jaqsarttyq. Porohtardy ajyratý ádisin biz ábden ózgerttik, jazataıym oqıǵalardyń oryn alý yqtımaldylyǵy barynsha azaıtyldy. Ártúrli oqytýdy júrgizemiz, qosymsha jabdyq, qorǵanys quraldary satyp alynýda, eńbekti kúzetý men óndiristegi qaýipsizdik jóninde mamandardyń qosymsha laýazymdary engizildi. Kádege jaratý boıynsha operasııalardyń barlyq túrleri beınebaqylanyp otyrady», dedi Erbol Álibekov. Kádege jaratý ónimderin iske asyrý nátıjesinde 2015 jyly respýblıkalyq bıýdjetke 322 mln. teńge aýdarylǵanyn aıta ketken jón. Dastan Kenjalın. Derek, sýret: Qazaqstan Respýblıkasy Qorǵanys mınıstrligi.