ASTANA. 11 qańtar. 1991 jylǵy jeltoqsannyń sońynda Qazaqstan Respýblıkasy Mınıstrleri Kabınetiniń qaýlysymen joǵary memlekettik bılik jáne memlekettik basqarý organdaryn, úkimettik mekemeler men joǵary áskerı qolbasshylyqty feldegerlik baılanyspen qamtamasyz etý úshin Qazaqstan Respýblıkasy Memlekettik feldegerlik qyzmet quryldy. Bul týraly egemen.kz tilshisi habarlady.
Sol ýaqyttan bastap Qazaqstandaǵy áskerı feldegerlik qyzmet kún saıyn basty mindetti oryndaýda. Iаǵnı, Qorǵanys mınıstrligi men Qarýly Kúshter Bas shtabynyń basshylyq quramyn baspasózben, gazetter jáne jýrnaldarmen qamtamasyz etedi.
Uly Otan soǵysy kezinde poshtany oq-dárilerge teńestirgen. Jaqyndary men týǵan-týysqandarynan orlar men tasalarǵa jetkizilgen hattar jaýyngerlerge kúsh bitirdi, jaýmen aıqasýda tótep berýge kómektesti, jeńiske degen úmit uıalatty. Zamanaýı feldegerler olardyń qyzmeti elektrondyq baılanys quraldarynyń damýyna qaramastan, árqashan suranysqa ıe bolatynyn aıtýda. Sebebi, olar hattardy mekenjaıǵa dál ýaqytynda jetkizedi.
Ár kún saıyn tańsáriden bastap adresattarǵa mańyzdy hat-habardy, gazetter men jýrnaldardyń jańa basylymdaryn jetkizýge tıis Qorǵanys mınıstrliginiń ekspedıtorlary jumysqa shyǵady. Olar poshtany qabyldaıdy, óńdeıdi, suryptaıdy, jınaqtap, ári qaraı jiberýge attanady. Kúnine qabyldaý, óńdeý, jetkizý qajet 1000-ǵa jýyq hat, 50-ge tarta gazet pen jýrnal kelip túsedi.
Ekspedıtorlar men suryptaýshylardyń birshamasy áıel áskerı qyzmetshiler ekendigi qyzyqty jáıt. Feldegerlerge anaǵurlym kúrdeli jumys júkteledi. Er áskerı qyzmetshiler aýa raıyna qaramastan, garnızon boıynsha qajetti hat-habardy jetkizedi. Hattar men poshta salynǵan qapshyqtar óte aýyr bolyp keledi. Onyń salmaǵy 70-80 kılodan asyp jyǵylady.
Feldegerlik qyzmettiń «jaraǵyndaǵy» mańyzdy kerek-jaraqtyń biri – ol frankırovaldi mashına. Ol poshta baılanysy qyzmetteriniń tólenýin rastaıtyn jazbasha hat-habarǵa poshta tóleminiń memlekettik belgilerin naqyshtaý, atalǵan hat-habardyń jáne ózge de aqparattyń qabyldanǵan kúnin belgileý úshin arnalǵan. Kún saıyn ólshengennen keıin ol arqyly barlyq kiris hat-habar ótedi.
«Qazirgi tańda álemniń burysh-buryshynda telefondyq, telegraftyq jáne radıobaılanystyń, ǵalamtordyń qaryshtaǵan kezinde feldegerlik qyzmet múldem qajetsiz kórinýi múmkin. Biraq, bul jańsaq pikir. Mańyzdy qujattardy ǵalamtorǵa da telefonǵa da senip tapsyra almaısyń. Tek senimdi, tııanaqty, kez kelgen jaǵdaıda jáne dál ýaqytynda júkti qupııa túrde jetkizýge qabiletti adamdardyń ǵana qolynan keledi», dep feldegerlik-poshta qyzmetiniń áskerı qyzmetshileri atap ótýde.
Osylaısha, Qazaqstan Respýblıkasy Qarýly Kúshteriniń feldegerlik qyzmeti kún saıyn zamanaýı júıeler men ýaqyt talabymen tekserilgen quraldardy qoldana otyryp, senimdi jáne úzdiksiz baılanysty qamtamasyz etedi.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.
