Áskerı qyzmetshiler AQSh-taǵy áriptesteriniń tájirıbesimen tanysty

ASTANA. 11 qańtar. Qazaqstan Respýblıkasy Qarýly Kúshteri tárbıe qurylymdarynyń áskerı qyzmetshileri AQSh-tyń áskerı bazalarynda bolyp qaıtty. Bul týraly egemen.kz tilshisi habarlady. QR QK Bas shtaby bastyǵynyń orynbasary – QR QK BSh Tárbıe jáne ıdeologııalyq jumystar departamentiniń bastyǵy general-maıor Muhamedjan Talasovtyń basshylyq etýimen delegasııa áskerı qyzmetshiler men olardyń otbasy múshelerine qoldaý kórsetý ortalyqtarynyń qyzmetimen tanysty, áskerı qyzmetshiler arasyndaǵy ózine-ózi qol jumsaý kórinisterin aldyn alýdyń uıymdastyrylýy men AQSh Qarýly Kúshterdegi kapellandar korpýsynyń tynys-tirshiligin zerdeledi. Qazaqstandyq armııada tárbıe jumysyn jetildirý sheńberinde QR QK tárbıe qurylymdarynyń ókilderi áskerı qyzmetshiler men olardyń otbasy múshelerine qoldaý kórsetý ortalyqtarynyń qyzmetin atap ótti. AQSh-tyń QK-de mundaı ortalyqtar árbir áskerı garnızonda qurylǵan. Ortalyqtar áskerı qyzmetshiler men olardyń otbasy múshelerine qoldaý kórsetý jóninde áleýmettik baǵdarlamalardy ázirlep, iske asyrady, garnızon aýmaǵynda bos ýaqytty ótkizýdi, áskerı qyzmetshilerdiń jubaılaryn jumysqa ornalastyrýdy uıymdastyrady, tómendetilgen baǵamen ártúrli turmystyq qyzmetter usynady, otbasylyq-turmystyq qarym-qatynastardy zerdeleıdi, moraldyq-psıhologııalyq, konsýltatıvtik jáne qarjylaı kómek kórsetedi. О́zine-ózi qol jumsaý kórinisterin aldyn alý jónindegi AQSh-tyń Qarýly Kúshteri qyzmetinde Qazaqstan delegasııasy «jaýyngerlik jup» júıesin atap ótti. Qatardaǵy jaýynger jáne kishi serjanttar quramynyń barlyq sanattaǵy áskerı qyzmetshileri jupqa bólingen jáne árqaısysy óziniń seriktesiniń moraldyq-psıhologııalyq jaı-kúıin baqylap otyrady.  «Jaýyngerlik qarýlastar» atty mundaı uqsas júıe Qazaqstannyń Qurlyq áskerlerinde is júzinde qoldanylyp júr. AQSh armııasynda ózine-ózi qol jumsaý problemalaryn sheshý jáne áskerı qyzmetshilerge ıdeologııalyq tárbıe berýge áskerı kapellandar korpýsy da úles qosýda.   Bul teologııalyq, ıaǵnı, dinı bilimi bar ofıserler.  Olar dinı ilim jáne patrıottyq tárbıe berý, otbasylyq qundylyqtardy baǵalaý, sýısıdti aldyn alýmen aınalysady. Dastan Kenjalın. Derek, sýret: Qazaqstan Respýblıkasy Qorǵanys mınıstrligi.