Kanada turǵyny lotereıadan 5 mln. AQSh dollaryn utyp aldy

ASTANA. 11 qańtar. Kanadada belgisiz bireý «49-dan 6» dep atalatyn ulttyq lotereıadan 7 mln. Kanada dollaryn utyp aldy. Bul soma AQSh dollaryna shaqqanda 5 mln.-dy quraıdy. Bul týraly TASS aqparat agenttigine silteme jasaǵan egemen.kz tilshisi habarlady. Atalǵan málimetti Kanadada onǵa jýyq ártúrli lotereıa oıyndaryn uıymdastyratyn Atlantic Lottery qaýymdastyǵy da rastap otyr. Ázirge utys bıleti halyq tyǵyz qonystanǵan eldiń Ontarıo aımaǵynda satylǵany belgili. Uıymdastyrýshylar oınalǵan nómirlerdi de jarııalady. Bir mezette ıesin baı qylǵan bılettiń nómirleri – 5, 22, 30, 33, 45 jáne 48. Bul lotereıanyń buǵan deıingi eń iri utysy 2 qańtar kúni tirkelgen edi. Ol kezde Kvebek aımaǵynyń turǵyny 23,4 mln. Kanada dollaryn (17 mln. AQSh dollary) utyp aldy. Aıta keteıik, ótken jyldyń qazan aıynda «49-dan 6» lotereıasy Kanada tarıhyndaǵy eń iri somadaǵy djekpotty oınatty. Naqty aıtqanda, ol kezde utys ıesi birden 64 mln. Kanada dollaryna (49,5 mln. AQSh dollary) baıyp shyǵa keldi. Elaman Qońyr. Derek: TASS. Sýret: AP Photo.