Internet alaıaqtary astanalyqtardy aldap soqty

ASTANA. 11 qańtar. Astana qalalyq ishki ister departamenti qala turǵyndary men qonaqtaryna ınternet arqyly alaıaqtyq jasaıtyndardyń paıda bolǵanyn eskertti. Búginde astanalyq tergeýshiler sondaı alaıaqtarǵa senip, iri kólemdegi aqshalarynan aıyrylǵan birneshe jábirlenýshiniń shaǵymy boıynsha tergeý jumystaryn júrgizýde. Bul týraly qalalyq ishki ister departamentiniń baspasóz qyzmetine silteme jasaǵan egemen.kz tilshisi habarlady. Atalǵan departamenttiń tergeý bóliminiń bastyǵy, polısııa maıory Almat Aqytaevtyń aıtýynsha, barlyq jaǵdaıda alaıaqtar qarapaıym qylmystyq júıe boıynsha áreket etken. Bul jóninde ol: «Jábirlenýshiler ınternet arqyly arzan baǵaǵa jyljymaıtyn múlik nemese basqa da taýarlardy tabady. Alaıda, olar kýálandyratyn qujattarynyń durystyǵy, memlekettik organdarda tirkelgendigi syndy tıisti tekseristerdi júrgizbesten «satýshylarmen» habarlasqan. Sol kezde arnaıy jospar boıynsha ózderin satýshy retinde tanystyrǵan alaıaqtar qurbandaryn shetelde júrgenine sendirgen. Osylaısha istiń baıybyna barmaǵan jábirlenýshiler «satýshyǵa» tólem qabilettiligine kepil retinde Money Gram jáne Western Union júıeleri arqyly kelisilgen somanyń bir bóligin aýdarǵan. Osy rette kóp jaǵdaıda iri kólemdegi aqsha aýdarylǵanyn atap ótken jón. Aýdarylǵan aqsha jábirlenýshilerdiń óz attaryna nemese biregeı kodyn kórsetý arqyly olardyń týysqandarynyń atyna túsken. Osydan keıin alaıaqtar bank qujattaryn biregeı kodsyz skanerlep, elektrondy poshta arqyly ózderine jiberýlerin suraǵan. Az ýaqyttan keıin belgisiz bireýler kórsetilgen qarjyny atalǵan shottan alyp otyrǵan. Mine, dál osy kezde keıbir jábirlenýshiler Shotlandııa, Portýgalııa, Fransııa syndy Eýropa elderinde Money Gram jáne Western Union júıeleri arqyly aýdarylǵan aqshany alý úshin biregeı kodtyń qajet emestigin anyqtaǵan», – deıdi bólim bastyǵy. Tekseris kezinde alaıaqtardyń jábirlenýshilermen baılanysqan IP adresi joǵaryda atalǵan elderge tıesili ekeni belgili boldy. Sol sebepti, Astana qalalyq ishki ister departamenti turǵyndarǵa elektrondy saýda jasaý kezinde asa saq bolý kerektigin qatań eskertedi. Elaman Qońyr. Derek: Astana qalalyq ishki ister departamentiniń baspasóz qyzmeti. Sýret: fishki.net.