AQSh prezıdentiniń ıtterin urlamaq bolǵan qylmysker qolǵa tústi

ASTANA. 11 qańtar. AQSh prezıdenti Barak Obamanyń otbasyna tıesili eki ıtti urlap ketemin dep qoqan-loqy kórsetken qylmysker qolǵa tústi. Bul týraly Interfax.ru-ǵa silteme jasaǵan egemen.kz tilshisi habarlady. The Washington Times basylymynyń habarlaýynsha, qylmysker Vashıngton qalasynda ustalǵan. Tintý kezinde onyń kóliginen qarý-jaraqtyń birneshe túri tabylǵan. Atap aıtqanda, 22 kalıbrli vıntovka, 350-den astam oq-dári, polısııa shoqpary jáne basqa da qarý túrleri bar. Qupııa qyzmettiń málimdemesine qaraǵanda, ustalǵan qylmyskerdiń esimi – Skott D.Stoker. 49 jastaǵy Skott Soltústik Dakotanyń turǵyny eken. Jaýap alý kezinde ol ózin Iısýs Hrıstos dep tanystyrǵan. Sondaı-aq, Djon Kennedı men Merılın Monronyń ulymyn degen ol AQSh prezıdenttigine saılaýǵa úmitker retinde qatysýdy josparlaǵanyn aıtqan. Aıta keteıik, Obama otbasy Bo esimdi birinshi ıtterin osydan jeti jyl buryn asyrap aldy. Tipti, sol ıttiń qurmetine «Bo, qarǵybaýy bar amerıkalyq bas qolbasshy» degen kitap ta jazyldy. Al eki jyl buryn Obamalar taǵy bir ıtti asyrap aldy. Oǵan prezıdent otbasy Sannı degen at qoıdy. Elaman Qońyr. Derek: Interfax.ru. Sýret: reuters.com.