Soltústik Qazaqstanda shetel azamaty 100 kılo esirtkimen ustaldy

PETROPAVL. 11 qańtar.  Tártip saqshylary «Isuzu Ascender» jeńil kóligin tekserý kezinde ósimdiktektes zat salynǵan úsh sómkeni keziktirdi. Sot-medısınalyq saraptama sómke ishindegi zat keptirilgen marıhýana ekenin anyqtady. Bul týraly oblystyq IID-niń baspasóz qyzmeti habarlady. Qyrǵyz Respýblıkasynyń 46 jastaǵy azamaty oblys ortalyǵyndaǵy Internasıonal jáne Astana kósheleriniń qıylysynda beınekamera arqyly quryqtaldy. 100 kılo kontrabandalyq júk  esirtki zattary bolyp shyqty. Qazir sheteldik azamat tergeý oqshaýlaǵyshyna qamalyp, esirtki zattarynyń qaıdan jáne qandaı maqsatpen ákelingenine qatysty tergeý amaldary júrgizilýde. Atalǵan fakt boıynsha Qylmystyq kodekstiń 297-baby boıynsha qylmystyq is qozǵaldy.  Esirtki tasýshynyń kinási dáleldense, 10 jylǵa deıin bas bostandyǵynan aıyrylýy yqtımal. «Byltyr 320 kılogramnan astam esirtki tárkilenip, 334 qylmystyń beti ashyldy», deıdi baspasóz qyzmetiniń ınspektory Iýrıı Klykov. О́mir Esqalı. Derek, sýret: Soltústik Qazaqstan oblystyq IID-niń baspasóz qyzmeti.