Foto: Ashyq derekkóz
Qoldanystaǵy zań boıynsha sabaq ústinde smartfon qoldanýǵa tyıym salynady. Atap aıtqanda, hat almasý, áleýmettik jelilerge kirý, vıdeo kórý, oıyn oınaý – bári de oqý prosesi kezinde ruqsat etilmeıdi. Degenmen, oqýshylarǵa telefondy mektepke alyp kelýge bolady. Ony tek úzilis kezinde, tótenshe jaǵdaıda nemese muǵalimniń ruqsatymen oqý tapsyrmasyn oryndaý úshin qoldanýǵa múmkindik bar.
Erejeni alǵash ret buzǵan jaǵdaıda eskertý jasalady. Qaıtalap buzsa, jaýapkershilik ata-analarǵa júkteledi. Aıyppul kólemi 5 aılyq eseptik kórsetkishke deıin jetýi múmkin (21 625 teńge).
Qazirgi tańda Parlament Májilisinde mektep aýmaǵynda smartfon qoldanýdy tolyq shekteýdi kózdeıtin zań jobasy qaralýda. Bul qujat pedagog mártebesi men bilim salasyna qatysty zańnamalarǵa ózgerister engizýdi usynady.
Qoldanystaǵy norma boıynsha mektepter úzilis kezindegi telefon paıdalaný tártibin ózderi anyqtaı alady. Al jańa usynysqa sáıkes, tyıym tek sabaqta ǵana emes, búkil oqý kúni boıy, ıaǵnı úzilisterde de kúshine enýi múmkin.
Bul jaǵdaıda oqýshylar mektepte múlde smartfon qoldana almaıdy. Erekshe jaǵdaılar tek ýákiletti organ bekitken arnaıy erejeler arqyly qarastyrylmaq.
Usynylǵan túzetýlerge sáıkes, telefon paıdalaný tártibin retteý quzyreti Bilim berý salasyndaǵy ýákiletti organǵa beriledi. Iаǵnı biryńǵaı talaptardy mınıstrlik nemese óńirlik bilim basqarmalary bekitedi.
Tolyq tyıym salý bastamasy qoǵamda qyzý talqylanyp jatyr. Qoldaýshylar kıberbýllıng azaıatynyn, áleýmettik jelilerge táýeldilik tómendeıtinin, balalar tiri qarym-qatynasqa kóbirek kóńil bóletinin, sondaı-aq oqý úlgerimi men tártip jaqsaryp qymbat gadjetterge baılanysty áleýmettik teńsizdik bolmaıtynyn aıtady. Al qarsy tarap ata-anamen jedel baılanys qıyndaıtynyn alǵa tartyp, sıfrlyq saýattylyq shekteletinine alańdaýshylyq bildirgen.
Kóptegen el mektepterinde smartfon qoldanýǵa túrli deńgeıde shekteý engizilgen. Keıbirinde ulttyq deńgeıde tolyq tyıym salynsa, basqalarynda mektep ákimshiligi óz tártibin belgilegen.
Sonymen qatar birqatar elde medısınalyq nemese erekshe bilim berý qajettilikteri bar balalarǵa arnaıy jeńildikter qarastyrylǵan. Qazaqstandaǵy Nazarbaev zııatkerlik mektepterinde 2025 jyldyń qyrkúıeginen bastap telefonǵa shekteý engizilgen.
Bul bastama tártip pen qaýipsizdikti kúsheıtýdi maqsat etedi. Alaıda qoǵamda sıfrlyq erkindik pen baqylaý arasyndaǵy tepe-teńdik máselesi áli de talqylanyp jatyr.
