Operanyń Otanyn moıyndatyp qaıtty

Eski jyl esigimizden shyǵyp, jańa jyl bosaǵamyzdan attaǵan ýaqytta elimizdiń mártebesin mádenıet salasynda bir saty joǵarylatyp qaıtqan «Astana Opera» teatry solısteriniń jetis­tikterin jetkizbesek, ult­tyq sı­patymyzǵa syn bolary sózsiz. Bizdiń ártister tórt kún boıy operanyń Otany sanalatyn Italııadaǵy Karlo Felıche teatrynyń sahnasynda Dj. Pýchchınıdiń «Bogema» operasynyń tusaýkeserinde óner kórsetti. Osyǵan oraı keshe Prezıdent janyndaǵy Ortalyq kommýnıkasııalar qyzmetinde baspasóz máslıhaty ótken bolatyn. Tórt kúnge sozylǵan operada Mımı partııasyn Aıgúl Nııazova, Rýdolfti Medet Shotabaev, Mıýzettany Saltanat Ahmetova, Marseldi Talǵat Musabaev, Shonardy Ev­genıı Chaınıkov, Kollendi Artur Qaıypqulov, al ekinshi qańtarda «Astana Opera» solısterimen Mımıdi ıtalııalyq soprano Serena Gambertonı, Rýdolfti Leonardo Kaımı oryndaǵanyn esterińizge salamyz. «II Sole 24 Ore Domenica» gazetiniń tilshisi qazaqstandyq jas trýppaǵa, ártister eýropalyq operaǵa shyǵys lebin qosty dep baǵa berdi. «Ettore Skolanyń qoıylymyna tolyǵymen qazaq­standyq ánshilerden turatyn quramnyń tabys ákelgeni sózsiz. Opera sahnasynyń juldyzy – Aıgúl Nııazova (Mımı) óz partııasyn tamasha meńgergenin pash etti. Medet Shotabaev (Rýdolf) joǵary notany jas kezindegi Pavarottı oryndaǵandaı aldy. Ásirese, Saltanat Ahmetovanyń tama­sha oryndaýyndaǵy Mıýzetta erekshe unady, onyń syńǵyrlaǵan, jarqyn tembri tańdaı qaqtyrady. Shonardyń partııasyn somdaǵan Evgenıı Chaınıkovtiń daýysyn­da batysqa tán reńk bar», – delingen 2016 jylǵy 3 qańtardaǵy maqalada. – Bul rejısser, dırıjer, so­lıs­ter, orkestr mýzykanttary men hordan quralatyn sheteldik qu­rammen Eýropa teatry sahna­synda aıshyqtalǵan mańyzdy tájirıbe boldy. Bizdiń ánshiler ıtalııalyq áriptesterden esh kem emes. Daýys yrǵaǵy, akterlik sheberligi jaǵynan barlyǵy joǵary dárejede kórindi. Biz tek «Astana Opera» teatrynyń ǵana emes, búkil Qazaqstannyń mártebesin asqaqtattyq, – dep atap ótti jıyn barysynda sóz al­ǵan Qazaqstan Respýblıkasynyń Eńbek sińirgen qaıratkeri Saltanat Ahmetova. Ártisterdiń aıtýynsha, ekinshi, úshinshi, tórtinshi kúnderden soń, qazaq ártisterin jankúıerler syrtta qoltańba alý úshin torýyldap turatyn bolǵan. Sonymen qatar, Italııada oqyp jatqan bir top qazaqstandyq stýdentter de qazaq ánshilerin tyńdaýǵa arnaıy kelgen. Oryndaýshylyq sheberlikti tyńdarmandar ǵana emes, dırıjerler de joǵary baǵalady. Qazaqstandyq ánshilerge bolashaqta birlesip jumys jasaý jóninde birqatar usynystar túsipti. Sondaı-aq, Dj. Pýchchınıdiń «Bogema» spektakli astanalyq sahnada 3 aqpanda ótetinin de esterińizge salamyz. Raýan QAIDAR, «Egemen Qazaqstan».