Imanjúzdi aýyl edik...

Avtobýsta kisi kóp edi. Janymda otyr­ǵan qarııa óz-ózinen sóılep otyr. «Za­man ne bolyp bara jatyr», deıdi qyn­jyla kúrsinip. Ańǵarǵanym, kúni-túni kúzetken qorasynan bireýler 5 qoıyn urlap ketipti. Taýsyla sóılep otyr. Ol kisini jubatar dármen joq edi bizde. Qazir «áı, sony qoıshy, bir qoıym ólip te qalady ǵoı» deıtin zaman emes. Kúzdikti bylaı qoıyp, soǵymnyń reti de sırep bara jatqanyn baıqaımyz. Aýyldyń asyraýshysy – maly. Sony da kóp kórgendeı, urlyq-qarlyq tyıylar emes. Aýyldyń adamy urynyń alystan kelmeıtinin biledi. Aryzdanyp, alashapqyn shyǵarmaıtynyn da talaı kórgenbiz. Qarııanyń oqıǵasy shekten shyqqannyń bir kórinisi. Osy joly, dáý de bolsa, oblystyń polısııasyna aryzdanyp kele jatyr. Avtobýsta kisi kóp edi... Tilshiler qosynyna kele salyp, oblystyq ishki ister departamentine qońyraýlattyq. Abyroı bolǵanda, ury­lar qolǵa túsken eken. Kimder deısizder ǵoı. Sumdyq. Sol aýyldyń 19-21 jas araly­ǵyndaǵy zińgitteı tórt jigiti. Sonsha­lyqty jerge qarap otyrǵandar emes. Qyl­mysqa kóliktiń tóresi sanalatyn japondyq «Nissan maxima» jeńil máshınesimen shyqqan. Olardyń ústinen QR QK 188-babynyń 2-bólimine jatatyn qylmystyq is qozǵalypty. Imanjúzdi aýyl edik... Ne bolyp barady ózi? Baqbergen AMALBEK, «Egemen Qazaqstan». Aqmola oblysy.