«Astana arlandary» jańa maýsymdy 23 qańtarda bastaıdy

ASTANA. 12 qańtar. Búkil álemdik boks serııasynda (WSB) el namysyn qorǵaıtyn «Astana arlandary» klýby chempıondyq ataǵyn qorǵap qalý jolyndaǵy jańa maýsymdy 23 qańtarda bastaıdy. Komandanyń alǵashqy kezdesýi sol kúni Qaraǵandyda ótedi. Bul týraly egemen.kz tilshisi habarlady. Bıyl altynshy maýsymy bastalatyn saıysqa álemniń 16 elinen 16 klýb qatysady. Olardyń ishinde osy jarysty eki márte jeńip alǵan «Astana arlandarynyń» bedeli joǵary. Aıta keteıik, osy maýsymda bizdiń komanda tek otandyq boksshylarmen synǵa túsedi. Eshqandaı legıonersiz saıysýdy kózdep otyrǵan ujym sapynda Samat Báshenov, Oljas Sáttibaev, Zákir Safıýllın, Temirtas Júsipov syndy tájirıbeli boksshylar bar. Komandanyń bas jattyqtyrýshysy Nurlan Aqúrpekovtiń aıtýynsha, «arlandar» alǵashqy kezdesýinde Ázerbaıjannyń «Baký ottary» komandasymen kúsh synasady. Odan bólek, bizdiń topta О́zbekstan jáne Pýerto-Rıko elderiniń klýbtary bar. Mamandar bıylǵy maýsym burynǵylardan da qyzyqty bolatynyn aıtyp otyr. Sebebi, bokstan álem boıynsha aldyńǵy sapta turǵan Qazaqstanmen qatar, jarys jolynda Reseı, Kýba, Ýkraına sııaqty azýly elderdiń ujymdary bar. Sondaı-aq, Ulybrıtanııanyń da komandasy qaıtadan qatarǵa qosyldy. AIBA-nyń jobasy bolyp sanalatyn WSB dodasy alǵash ret 2010-2011 jylǵy maýsymda uıymdastyryldy. Sodan bergi bes maýsymǵa da qatysqan «Astana arlandary» úzdik úshtikten tómen túsip kórgen joq. Atap aıtqanda, eki márte chempıon atansa (2013-2014, 2015), bir ret – kúmis (2010-2011), eki ret qola júldege (2011-2012, 2013-2014) qol jetkizdi. Taǵy bir eskere ketetin jaıt, «arlandardyń» maýsym barysyndaǵy barlyq kezdesýleri «Habar» telearnasynan tikeleı efırde kórsetiledi. 23 qańtar kúngi Qaraǵandy qalasynda bolatyn alǵashqy aıqas Astana ýaqytymen saǵat 18:00-de bastalady. Elaman Qońyr. Derek: egemen.kz. Sýret: vk.com.