Gvatemalada túrmedegiler kúzetshilerdi kepilge aldy

ASTANA. 12 qańtar. Gvatemalada túrmedegiler búlik shyǵaryp, birneshe adamdy kepilge aldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. Jergilikti bıliktiń málimdeýinshe, aptanyń birinshi kúni birden eki túrmedegi tutqyndar bas kótergen. Ulttyq polısııa dırektory Nerı Ramostyń derekterine qaraǵanda, «Fraıhanes-1» túrmesinde búlikshiler 20 adamdy tutqynǵa alǵan. Kepildikke alynǵandardyń bireýi mekeme dırektory bolsa, qalǵan 19-y kúzetshi. Qazir jazasyn óteýshiler men bılik arasynda kelissózder júrgizilýde. Sonyń nátıjesinde azamattyq tulǵadaǵy úsh tutqyn bosatyldy. Túrme tolyǵymen polısııanyń arnaıy qurylymdarymen qorshaýǵa alynyp, áskerıler shyǵatyn esiktiń aldyna jeńil tanki ákeldi. Dál osyndaı baskóterý «Chımaltenango» túrmesinde de bastaldy. Prensa Libre portalynyń habarlaýynsha, túrmedegi sottalǵandardyń lańynan kem degende bir adam qaza bolyp, taǵy birnesheýi jaralanǵan. Polısııa qyzmetkerleri búlik bastalǵan kezde túrmege kelgen bir top áıeldi qaýipsiz jerge shyǵaryp úlgergen. Elaman Qońyr. Derek, sýret: RIA «Novostı».