Qarýly Kúshterdiń jaýyngerlik áleýeti bir jarym esege ulǵaıdy

ASTANA. 12 qańtar. 2015 jyly Qazaqstannyń Qarýly Kúshterinde qabyldanǵan barlyq sharalar olardyń jaýyngerlik áleýetin 1,5 esege ulǵaıtýǵa múmkindik berdi. Bul týraly egemen.kz tilshisi habarlady. Osy jyly jumys 6 negizgi baǵyt, ıaǵnı, jaýyngerlik, jedel jáne jumyldyrý daıarlyǵy, qorǵanys-ónerkásibi keshenin damytý, áskerı ınfraqurylymnyń qurylysy, áskerı bilim berý júıesin jetildirý, halyqaralyq yntymaqtastyq, Qazaqstan Respýblıkasy Qarýly Kúshterdegi ıdeologııalyq jumys boıynsha júrgizildi. 2015 jyly QR Qarýly Kúshterinde 170-ten asa josparly tekseris ótkizildi. Onyń ishinde: 71-i Qurlyq áskerlerinde, 17-si Áýe qorǵanysy kúshterinde, 1-eýi Áskerı-teńiz kúshterinde, 85-i ózgelerde ótkizildi. Kelisimshart negizindegi áskerı qyzmetshiler men merzimdi sarbazdar sanynyń arasalmaǵy ózgerdi. Búgingi tańda armııanyń 80 % kelisimshart boıynsha áskerı qyzmetshiler men  20 % merzimdi qyzmettegi sarbazdardan quralǵan. Eleýli ózgerister áskerı bilim berý salasyn da qamtydy. Bıylǵy jyly áskerı kafedralarda jańa erejeler engizildi jáne 26 mamandyq boıynsha qyz balalardy irikteý júrgizilýde, barlyq oqý oryndaryna qabyldaý boıynsha jańa qaǵıdalar bekitildi, jańa psıhologııalyq testiler engizildi. Odan basqa, áskerı bilim berýdiń erekshelikterin eskere otyryp, kredıttik tehnologııa boıynsha oqytýǵa kóshirý júzege asyryldy. Bul úırenýshiler úshin áskerı taǵylymdamanyń kólemin 2,5 esege arttyra túsedi. Qazaqstan Respýblıkasynyń aqparattyq qaýipsizdigin qamtamasyz etýdegi ózgeris te mańyzdy bolyp tabylady. Kıbershabýyldarǵa dýshar etýge qıyn bolyp keletin tehnıkalyq qamtamasyz etýdiń anaǵurlym kúrdeli júıesi engizilýde. Sondaı-aq kadrlardy daıarlaýdyń tutastaı ári tıimdi júıesi qurylýda. Dastan Kenjalın. Derek, sýret: egemen.kz