Aqtóbe oblysynda qysqy demalys ortalyǵy ashyldy

AQTО́BE. 12 qańtar. Aqtóbe qalasyna qarasty Aqjar aýylynda «Aqbóbek-Vostok» qysqy demalys ortalyǵy ashyldy. Bul týraly egemen.kz tilshisi habarlady. Ortalyqta gazben jylytylatyn uıadaı bólmeleri, ýaqtyly ystyq tamaǵyn ázirlep otyratyn kafeterııi, ystyq chebýrek daıyndaıtyn kafesi bar. Kelýshilerdiń ózderi káýáp daıyndaımyn dese, oǵan da kerek-jaraq tabylady. Qysqy demalystyń sánin keltiretin shańǵy, konkı tebý, taza aýada hokkeı, fýtbol, basketbol oınaý, tıýbıngtermen (ballon tárizdi zamanaýı shanalar) syrǵanaýǵa qajetti jaǵdaıdyń bári jasalǵan. Konkı tebýge arnalǵan muz aıdyny da bar. Sonymen qatar, ortalyqta 3-7 jas aralyǵyndaǵy búldirshinderge arnalǵan syrǵanaq bir bólek. 10 jastan ári qaraıǵy kelýshilerge arnalǵan syrǵanaq taǵy bar. Olardy 230 metr bıiktikke Aqjar taýynyń basyna shyǵaratyn arnaıy joǵary kótergish jumys jasap tur. «Aqbóbek-Vostok» qysqy ortalyqtyń dırektory Aıbolat Tashpentaevtyń aıtýynsha, demalys orny ótken jyldyń 26 jeltoqsanynda ashylǵan. Munda kelýshilerdiń qaýipsizdigi úshin táýlik boıy kúzet qyzmeti qarastyrylǵan. Qarapaıym halyqqa qoljetimdi demalys ornynda otbasylaryna, ujymdarǵa balalarymen dem alýǵa, densaýlyqtaryn jaqsartýǵa múmkindik mol. Satybaldy Sáýirbaı. Derek, sýret: egemen.kz.