Darııanyń kemeri tolyp tur

Jazdaǵy aptap ystyqqa qarap qys qytymyr bolatyn shyǵar degen oı bolǵan. Tabıǵattyń zańdylyǵy solaı ǵoı. Degenmen, bıylǵy qys jazdyń álpetine qaramady. Qazir Qyzylordańyzda kóktem sııaqty. Aptalap jańbyr jaýady. Sońy qarǵa ulasady. Biraq aıaz joq. Jer qatpaıdy. Sondyqtan, Syrdarııanyń beti tolyq qatyp úlgergen joq. Oǵan jańbyr men qar aralasqannan soń, sýdyń kólemi de ulǵaıdy. Osyǵan oraı tıisti mekemeler sý tasqynynyń aldyn alý sharalaryn júrgizýde. Oblys arqyly ótetin Syrdarııa ózenindegi jaǵdaıǵa asa mán berip, kúni-túni baqylaýda. Syrdarııa ózeniniń Aral jáne Qazaly aýdandarynyń tusynda kúr (tolyq qatpaǵan muzdyń túri) paıda boldy. Bul strategııalyq nysan sanalatyn Syrdarııanyń kishi Aral teńizine quıar saǵasyndaǵy «Aqlaq» tospasynyń sý ótkizý qabiletin tómendetip, bógetke qaýip tóndirýde. Atalǵan bóget tusynda 12 shaqyrymdaı jerge deıin kúr keptelip tur. Ol ózen sýynyń aǵýyna kedergi keltirýde. «Aqlaq» sý tospasy 3 seksııadan turady. Sonyń ekeýi osy kúrdiń saldarynan bitelip tur. Dál osyndaı qaýip «Aqlaq» bógetinde sońǵy 8 jyldan beri oryn almaǵan. Taǵy bir kedergi keltirip turǵany «Aqlaq» sý tospasynyń tómengi aǵysynda qalqymaly kópir bar. Buryndary jumys jasap, keıin sýdyń astynda qalyp qoıǵan. Bul da sýdy ótkizý qabiletin tómendetip otyr. Osy máselege baılanysty oblys ákiminiń orynbasary Serik Súleımenovtiń tóraǵalyǵymen jedel shtab qurylyp, qaýipti seıiltý baǵytynda jumystar júrgizildi. Bul jumystarǵa búginde barlyq jaýapty saladan 130 adam, 19 aýyr tehnıka jumyldyryldy. Sondaı-aq, kúrdi ydyratý úshin ózenniń saǵalary tazartylyp, Shardara sý qoımasynan jiberiletin sýdyń kólemi azaıtylyp, 9 kanalǵa sý jiberildi. Arnaıy tehnıkalardyń kómegimen «Aqlaq» sý tospasyndaǵy bógetter 100 metrge deıin muzdan tazartyldy. Bul jumystarmen qatar «Qarashalań» kóline quıatyn «Saǵynbaı» kanaly ashyldy. Qalqymaly kópir tusyndaǵy kúr keptelisin joıý úshin arnaıy jarǵysh jabdyqtary bar brıgada shaqyrtyldy. Keptelgen kúrdi Aral teńizine jyljytý maqsatynda Syrdarııa ózeninde muz jarý jumystary júrgizildi. Sý tasqynyn aldyn alý sharalary oblys ákimdiginiń qatań baqylaýynda. Jyl saıyn paıda bolatyn qaýipti aımaqtarda turaqtylyqty qamtamasyz etý úshin tıisti mekemeler barlyq qajet qural-jabdyqtarmen qamtylǵan. Únemi monıtorıng júrgizilip otyratyn 71 ýchaske bar. Barlyq jaýapty mekemeler qaýip tóngen jaǵdaıda shuǵyl áreket etýge daıyn. Erjan BAITILES, «Egemen Qazaqstan». Qyzylorda oblysy.