Sarapshylar pikiri salıqaly

Prezıdent janyndaǵy Ortalyq kommýnıkasııalar qyzmetiniń Almatydaǵy ókildiginde Memleket basshysynyń «Ult Jospary – qazaqstandyq armanǵa bastaıtyn jol» atty maqalasynda aıtylǵan ózekti máselelerge qatysty otandyq sarapshylar baspasóz brıfıngin ótkizdi. Buqaralyq aqparat quraldary ókilderimen bolǵan kezdesýge Prezıdent janyndaǵy Strategııalyq zertteýler ınstıtýtynyń Almatydaǵy ókil­diginiń jetekshisi, saıası ǵylym­dar kandıdaty Mádına Nurǵa­lıeva men Fılosofııa, saıasattaný jáne dintaný ınstıtýty dırektorynyń ǵylymı jumystar jónindegi orynbasary, fılosofııa ǵylymdarynyń doktory, professor Serik Nurmuratov qatysty. Memlekettiń damýy jáne qo­ǵamnyń rýhanı-mádenı ilgeri basýy úshin urpaq tárbıesi men qoǵamdy rýhanı saýattandyrýdyń mańyzdy ekenin atap ótken S.Nurmuratov qazaq halqyna ulttyq ıdeıanyń aýadaı qajet ekendigine toqtalyp, álemniń órkenıetti elderdiń saıası-rýhanı damý tehnologııalarynan kóptegen mysaldar keltirdi. – Elbasy Nursultan Nazarbaev jýyrda jarııalaǵan «Ult Jospary – qazaqstandyq armanǵa bastaıtyn jol» atty baǵdarlamasynda óziniń budan burynǵy Joldaýynda aıtylǵan negizgi oılaryn tereńirek qozǵap, eli­mizdiń strategııalyq mańyzdy baǵy­tyn ashyp berdi. Joldaýda usynyl­ǵan mańyzdy 5 reforma tikeleı ómi­rimiz­diń árbir salasyna asa qajetti tujy­rymdar ekendigi naqty kórinis tapqan. Álemdi jaılaǵan daǵdarystyń yqpalynda túrli úderister júrip jatyr. Ekonomıka, saıasat, din má­selesinde týyndaǵan túsinispeý­shilik­terden Qazaqstan qoǵamyn saqtap qalý úshin tyń ıdeıalar, damý tetigi kerek boldy. Mine, Memleket basshysy osyndaı adamzattyń damýyna orasan zor yqpal etetin ıdeıany «Ult Jospary» degen uǵymnyń ishine syıdyryp otyr, – dedi professor Serik Nurmuratov. Ulttyq qundylyqtardy ór­ke­nıettik qundylyqtarmen qatar damyta otyryp, qoǵamnyń saıası, qu­­qyq­­tyq saýatyn arttyrýǵa erekshe mán berilý jumysy elimizde du­rys jol­ǵa qoıylyp otyrǵandyǵyn sóz et­ken Strategııalyq zertteýler ıns­tı­týtynyń Almatydaǵy ókildigi­niń jetekshisi M.Nurǵalıeva jýrna­lıster men elimizdiń ózge óńirleri­nen tikeleı efırde qoıylǵan suraq­tarǵa ekonomıkalyq jáne quqyqtyq má­seleler oraıynda jaýap berip otyrdy. – Elbasy usynǵan ıdeıalarda biz­diń qoǵamǵa asa qajetti ıns­tı­týt­tyq júıelerdi jańǵyrtý talaby alǵa qoıylǵan. Osynyń ishinde qa­zaq­standyq qoǵam úshin jaýapkershiligi joǵary salanyń biri – sot júıesi. Sot júıesine qoǵamǵa paıdaly ózgerister engize otyryp, onyń quramynda kezdesetin sot isin júrgizýshi mamandar biliktiligin saralaý, sybaılastyq kórinis tabatyn tustardy boldyrmaý, mamandyqqa saı suranystyń azdyǵy sekildi kemshilikterdi boldyrmaý. Mine, Memleket basshysynyń halyqqa usynǵan ıdeıasynda ult damýyn ilgeri bastyratyn asa mańyzdy strategııalyq qadamdar naqty qamtylyp otyr. Osyǵan oraı budan bylaıǵy jerde sot júıesine mamandar tartý jumysy qatań talaptarǵa saı júrgiziletin bolady. Sonymen qatar, quqyq qorǵaý salasyna da jaǵymdy ózgerister engizilýde. Atap aıtsaq, jergilikti polısııa qyzmetin jandandyrý máselesi de búgingi tańda qoǵam damýy úshin mańyzdy ról atqaratyn áleýmettik-saıası qural. Bul eki ınstıtýttyq júıe qoǵamnyń quqyq qorǵaý salasyna degen senimin arttyryp, el turaqtylyǵyn qamtamasyz etetin negizgi kilti dep senimdi túrde aıtýǵa bolady, – dedi Mádına Nurǵalıeva. Ortalyq kommýnıkasııalar qyzmetiniń Almatydaǵy ókildiginde ótken baspasóz brıfıngine qatysqan mamandar saıasat, quqyq qorǵaý, rýhanı jáne dinı qatynastarǵa qatysty elimizdiń ózge de óńirlerinen tikeleı efır arqyly qoıylǵan suraqtarǵa jaýap berdi. Qanat ESKENDIR, «Egemen Qazaqstan». ALMATY.