Komedııa akteri el basqarady

Budan bylaı Ortalyq Amerıkada ornalasqan Gvatemala memleketin komedııa akteri Djımmı Morales basqarady. Búginde ol prezıdent laýazymyndaǵy jańa qyzmetin bastap ketti. Jergilikti televıdenıeniń habarlaýynsha, ulyqtaý rásimi el astanasy – Gvatemala qalasyndaǵy ulttyq teatrda ótken. Saltanatty jıynda Djımmı Morales ant qabyldap, prezıdenttik lenta­ny qabyldap aldy. Atalǵan rá­simge on shaqty memlekettiń basshysy, sondaı-aq, AQSh-tyń vıse-prezıdenti Djo Baıden qatysty. D.Morales 2015 jyldyń qazan aıynda ótken saılaýdyń ekinshi kezeńinde jeńiske jetip, Gvatemalanyń 50-shi prezıdenti atandy. Negizi gvatemalalyqtar úshin D.Morales birinshi kezekte komedııa janryndaǵy akter ári rejısser retinde jaqsy tanys. Akterdiń jergilikti telearnalardyń birinen jeksenbi saıyn berilip otyratyn ázil-ospaq baǵdarlamasy zor suranysqa ıe. Sondaı-aq, 46 jas­taǵy saıasatker, tórt balanyń ákesi kásipkerlikpen de aınalysady. Odan bólek, sý jańa prezıdent qorǵanys jáne qaýipsizdik salalary boıynsha mamandyqtardyń magıstranty ekenin de atap ótken jón. Saıası sahnadaǵy qadamyn en­di bastaǵan Morales jańa qyz­me­tinde Gvatemala úshin eń ma­ńyz­dy máseleniń biri – sybaılas jem­qor­lyqpen kúres júrgizýge ýáde berdi. Sondaı-aq, ol jumysynyń eń bas­ty baǵyty retinde áleýmettik jaǵ­­daıy nashar jergilikti halyq­tyń azyq-túlik máselesin sheshý, bilim berý júıesindegi ózekti su­raq­tardy qolǵa alý jáne kásip­kerlikti da­mytýǵa qolǵabys jasaý ekenin atap kórsetti. Elaman QOŃYR, «Egemen Qazaqstan».