Býrkına-Fasoda sodyrlardyń shabýylynan 27 adam qaza tapty

ASTANA. 16 qańtar. Sodyrlardyń Býrkına-Fasonyń astanasy – Ýagadýgý qalasyndaǵy shabýyly kezinde 27 adam qaza boldy. Bul týraly RIA «Novostı» aqparat agenttigine silteme jasaǵan jasaǵan egemen.kz tilshisi habarlady. Fransııanyń atalǵan eldegi elshisi Jıl Tıbonyń aıtýynsha, Ýagadýgýdegi meıramhana men qonaq úıdi basyp alý kezinde qaza bolǵan qurbandardyń sany 27-ge jetken. Budan buryn shabýyl saldarynan 23 adamnyń kóz jumǵany týraly habarlanǵan edi. Jıl Tıbo Twitter-degi jeke paraqshasynda: «Qurbandar sany 27-ge jetti. Qaza bolǵandardyń ulttary áli belgisiz», – dep jazǵan. Ol sondaı-aq, kúsh qurylymdarynyń qonaqúıden 150 adamdy qaýipsiz jerge shyǵaryp, qajetti dárigerlik kómek kórsetkeni jóninde de málimdegen. Ǵımaratta bolǵandardyń arasynda 18 eldiń ókili bar. Esterińizge sala keteıik, keshe, ıaǵnı, 15 qańtar kúni belgisiz bireýler dámhanaǵa oq jaýdyryp, Ýagadýgýdegi Splendid qonaq úıindegi adamdardy kepildikke alǵan bolatyn. Bul qonaq úıge batys elderiniń ókilderi, sonyń ishinde BUU-nyń qyzmetkerleri jıi toqtaıtynyn atap ótken jón. Fransııanyń dıplomatııalyq ókilderi men reseılik qurmetti konsýl bul qanquıly oqıǵany terrorısterdiń shabýyly dep atady. SITE monıtorıngtik toptyń aqparatyna sáıkes, Býrkına-Fasodaǵy qandy shabýylǵa qarasha aıynda Malı astanasyndaǵy qonaq úıdi basyp alǵan «Ál-Mýrabıtýn» lańkestik tobynyń tikeleı qatysy bar. Elaman Qońyr. Derek: RIA «Novostı». Sýret: AFP.