Álem baılary jańa jyl bastalǵaly 305 mlrd. dollarynan aıyryldy

ASTANA. 17 qańtar. Álemdegi eń baı adamdar jyl basynan beri 305 mlrd. AQSh dollaryn joǵaltty. Bul týraly interfax.ru agenttigine silteme jasaǵan egemen.kz tilshisi habarlady. Jańa jyldyń alǵashqy eki aptasynda álemniń eń qaltaly 400 adamy jalpy aıtqanda 305 mlrd. dollarynan aıyryldy. Sol sebepti, álemdik naryq úshin 2016 jyldyń basy eń kúrdeli kezeń retinde este qaldy. Bloomberg kompanııasynyń málimdeýinshe, jaǵymsyz dınamıka Azııa, Eýropa jáne Amerıka naryqtarynda jıi baıqalýda. Sondaı-aq, Iranǵa qarsy sanksııany alyp tastaý máselesi qozǵalǵaly munaıdyń da baǵasy kúrt tómendep ketti. Bloomberg Billionaires Index-tiń derekterine súıensek, osy aptanyń ózinde ǵana álem baılary 115 mlrd. dollaryn joǵaltty. Sonyń ishinde 76 mıllıarderdiń árqaısysy bir mlrd. jáne odan da kóp aqshasynan aıyryldy. Sondaı-aq, tek juma, ıaǵnı, bir kúnniń ózinde jeti adamnyń árqaısysynyń baılyǵy bir mlrd. dollarǵa jáne odan da kóp qarjyǵa azaıdy. 2016 jyl bastalǵaly daǵdarystan eń kóp zardap shekken mıllıarder – Amazon kompanııasynyń negizin qalaýshy, álemniń eń baı adamdarynyń qatarynda 4-orynda turǵan Djeff Bezos. Ol 1 qańtardan beri 8,9 mlrd. dollaryn joǵaltty. Osy aptanyń aıaǵynda onyń kompanııasynyń aksııasy 3,85 paıyzǵa arzandap, 1,9 mlrd. dollary jelge ushty. Al álem baılarynyń ishinde kósh bastap turǵan Bıll Geıts jańa jyldan beri 6,8 mlrd. dollarynan aıyryldy. Qytaıdyń eń baı adamy Van Szıanlın de meshin jyly bastalǵaly 6,4 mlrd. dollaryn joǵaltty. Eń baı adamdardyń tiziminde turǵan 400 mıllıarderdiń 9-y ǵana jańa jyldy tabysty bastady. Olardyń ishinde Reliance Industries Ltd. kompanııasynyń basshysy, Úndistan kásipkeri Mýkesh Ambanıdiń esebi túgel. Atap aıtqanda, ol 1 qańtardan beri baılyǵyn 620 mln. dollarǵa kóbeıtti. Qazirgi tańda tizimde turǵan eń baı adamdardyń baılyǵy 3,6 trln. dollardy quraıdy. 2015 jyldyń mamyr aıynda bul kórsetkish 4,3 trln. dollar bolǵan edi. Elaman Qońyr. Derek: Interfax.ru. Sýret: TASS.