Basketbol. «Astana» óz alańynda «Nıjnıı Novgorodtan» basym tústi

ASTANA. 17 qańtar. Búgin «Astana» basketbol komandasy VTB Biryńǵaı lıgasy sheńberinde óz alańynda Reseıdiń «Nıjnıı Novgorodyn» qabyldap, 101:79 esebimen jeńiske jetti. Bul týraly egemen.kz tilshisi habarlady. Birinshi kezeńde «Astananyń» basymdyǵy anyq baıqaldy. Nátıjesinde bul bólikte bizdiń komanda 34:25 esebimen basym tústi. Esesine, ekinshi kezeń qonaqtardyń belsendiligimen ótti. Júıeli oıyn órnegin kórsete bilgen reseılikter úlken úziliske deıin esep aıyrmasyn 4 upaıǵa deıin qysqartty (55:51). Alaıda, jeńiske degen jigerligimen kózge túsken astanalyqtar qalǵan eki kezeńde óz paıdalaryna tıisinshe 25:17 jáne 21:11 esepterin tirkedi. Osylaısha, jalpy esepte 22 upaı basymdyǵymen (101:79) jeńiske jetken Ramýnas Býtaýtastyń shákirtteri jankúıerlerine qýanysh syılady. Oıyn barysynda «Astana» sapynan Djerrı Djonson men Patrık Kalates sheberlikterimen kózge túskenin atap ótken jón. Osy maýsymda lıga aıasynda 15 oıyn oınaǵan komandamyz búginde týrnır kestesinde 13-orynda keledi. Elordalyqtar lıga aıasyndaǵy kelesi kezdesýin 24 qańtar kúni qonaqta Estonııanyń «Kalev» komandasymen ótkizedi. Elaman Qońyr. Derek: egemen.kz. Sýret: bcastana.kz.