Sırııada «Islam memleketiniń» sodyrlary 400 adamdy kepilge aldy

ASTANA. 17 qańtar. Sırııada «Islam memleketi» lańkestik tobynyń sodyrlary 400 adamdy kepildikke aldy. Bul týraly RIA «Novostı» aqparat agenttigine silteme jasaǵan egemen.kz tilshisi habarlady. «Reıter» agenttiginiń habarlaýynsha, eldiń shyǵysyndaǵy Deır-ez-Zor qalasyna shabýyl jasaý kezinde «Islam memleketi» lańkestik toby kem degende 400 adamdy tutqynǵa alǵan. Syrian Observatory for Human Rights quqyq qorǵaý uıymy keltirgen derekke qaraǵanda, kepildikke alynǵandardyń arasynda Sırııa áskeri jaýyngerleriniń otbasy músheleri de bar. Atalǵan uıym basshysy Ramı Abdýlrahman: «Olardyń ómirine qaýip tónip tur. О́ıtkeni, lańkestik uıym ózge aýdandarda jasaǵandaı, bul joly da kepildegilerdi óltirý múmkindigi joqqa shyǵarylmaıdy», – deıdi. Budan buryn sırııalyq SANA agenttigi Deır-ez-Zorda lańkestik shabýyl kezinde kem degende 300 adam, onyń ishinde áıelder men balalar da óltirilgen dep habarlaǵan bolatyn. Elaman Qońyr. Derek: RIA «Novostı». Sýret: AP Photo.