Almatyda jobadaǵy 26 balalar alańynyń 5-shisi paıdalanýǵa berildi

ALMATY. 18 qańtar. Naýryzbaı aýdanynda bıznestiń áleýmettik jaýapkershiligi jobasyna sáıkes salynatyn 26 balalar alańynyń besinshisi paıdalanýǵa berildi. Bul týraly egemen.kz habarlady. «Almaty qalasyn damytý-2020» baǵdarlamasynyń «Áleýmettik beıimdelgen qala» dep atalatyn baǵytyna oraı aýlalardy túrlendirý jumystary qarqyndy túrde júrgizilip jatyr. Bul qadam qalada 2020 jylǵa deıin sportpen turaqty túrde aınalysatyn turǵyndardyń sanyn 30 paıyzǵa jetkizýge múmkindik beredi – degen Naýryzbaı aýdany ákiminiń orynbasary Baǵlan Dandybaev almatylyq kásipkerlerge alǵysyn bildirdi. Qalada salaýatty ómir saltyn nasıhattaýǵa jáne balalar men jasóspirimderdiń sportpen aınalysýyna qoldaý kórsetý dástúrli túrde jalǵasyn tabýda. Mını-fýtbolǵa arnalǵan alańqaı, kóshe trenajeri, átkenshek, aınalmaq, basqa da túrli oıyn-jattyǵýlarǵa arnalǵan keshenniń aýdany 1250 sharshy metrdi quraıdy. Ony salýǵa «Zedan» jaýapkershiligi shekteýli seriktestigi 16 mıllıon teńgedeı qarjy jumsady. Talǵat Súıinbaı. Derek, sýret: egemen.kz.