ORAL. 18 qańtar. Batys Qazaqstan oblysynyń ortalyǵy – Oral qalasynda jol apaty saldarynan tatar meshitiniń naıb ımamy Erǵalı qajy Jumatash pen prokýratýra salasynda uzaq jyldar boıy qyzmet etip kelgen Batyr Jazbaev qaza tapty. Bul týraly egemen.kz tilshisi habarlady.
Jol apaty 14 qańtar kúni Saratov-Oral tasjolynda bolǵan. Tasqala aýylynan shyǵyp, Oral qalasyna birneshe shaqyrym qalǵan tusta «Leksýs» avtokóligi joldyń qarsy betine shyǵyp «Toıota Prado» avtokóligine betpe bet soqtyǵysqan. Saldarynan «Leksýs» kóliginde otyrǵan Oral qalalyq Mýhammed-Ǵarıf atyndaǵy meshittiń naıb ımamy, 10 jyl oblys ımamy qyzmetin atqaryp kelgen, elge tanymal Erǵalı qajy Jumatash pen prokýratýra salasynyń ardageri Batyr Jazbaev jedel járdemmen reanımasııaǵa jóneltilip, kóp keshikpeı oblystyq klınıkalyq aýrýhanada kóz jumdy. Al «Toıotanyń» júrgizýshisi aman qaldy.
Ortalyq meshit ókilderiniń rastaýynsha, Erǵalı qajy Jumatash tatar meshitiniń naıb ımamy bolyp qyzmet ete júrip 2016 jyldyń 14 qańtary kúni Tasqala aýylyna jerleý rásimin ótkizýge barady. Keıin sol aýyldan qalaǵa bet alǵan tusta jol apatyna ushyrap qaza boldy.
Aıta keterlik jaıt, 49 jastaǵy Erǵalı qajy Jumatash oblysta 90-shy jyldardan beri 10 jyl oblystyń bas ımamy bolyp qyzmet etip kelgen. Al onyń jol seriktesi bolǵan Batyr Jazbaev 1952 jyly 21 qarashada Tasqala aýylynda dúnıege kelgen. Prokýratýra salasynda 1988 jyldan bastap eń alǵash qyzmetin Almaty qalasy prokýrorynyń kómekshisi, Almaty oblystyq prokýratýrasynyń aǵa tergeýshisi, Qapshaǵaı qalasy prokýrorynyń orynbasary, Atyraý, Oral qalasynyń prokýrory jáne Batys Qazaqstan oblysy prokýrorynyń orynbasary qyzmetterin atqarǵan.
Apat bolatyn kúni Oral qalasy aýmaǵynda qatty boran turyp, qalyń qar jaýǵanyn atap ótken jón.
Temir Qusaıyn.
Derek: egemen.kz.
Sýret: egemen.kz, mgorod.kz.
