Qytaıda avtobýs órtinen qaza tapqandar sany 18 adamǵa jetti

ASTANA. 18 qańtar. Qytaıdyń soltústik-batysynda ornalasqan Inchýan qalasynda bolǵan avtobýs órtinen qaza tapqandar sany 18 adamǵa jetti. Denesiniń 98 paıyzyn kúıik shalǵan bir adam aýrýhanaǵa jetkizilgen bette kóz jumdy. Bul týraly Sınhýa aqparat agenttigine silteme jasaǵan egemen.kz tilshisi habarlady. Sondaı-aq, aýrýhanaǵa zardap shekken 32 adam jetkizildi. Dárigerler olardyń jaǵdaıy bir qalypqa túskenin málimdedi. Aıta keteıik, oqıǵa qańtardyń 5 kúni bolǵan. Nınsıa-Hýeısko avtonomııalyq aımaǵynyń ákimshilik ortalyǵynda bolǵan avtobýs órtin Ma Iýnpın esimdi azamat istegeni anyqtaldy. Qazirgi sátte ol ýaqytsha qamaýǵa alyndy. «Ma Iýnpın qurylys jumysynda istegen. Alaıda, qosalqy merdigerlermen kelisimshart jóninde ortaq mámilege kele almaǵan. Birneshe ret bul olqylyqtyń ornyn toltyrǵysy kelgenimen, oılaǵan oıy júzege aspady. Sońynda qylmystyq áreketke baryp, qoǵamdyq avtobýsty órtep jiberdi», – deıdi jergilikti prokýratýra qyzmetkerleri. Aıan Ábdýálı. Derek: Sınhýa. Sýret: regnum.ru.