О́SKEMEN. 18 qańtar. Shyǵys óńirinde Táýelsizdiktiń 25 jyldyq mereıtoıyna arnalǵan «Týǵan el – altyn besigim!» aksııasy aıasynda gala-konsert ótti. Bul týraly egemen.kz tilshisi habarlady. Atalǵan aksııaǵa jeti jyl boıy óńirdiń qalalary men aýdandary belsendi túrde qatysyp, ózderiniń ekonomıkalyq hám mádenı áleýetin tanytqan bolatyn. О́ner keshinde Jarma aýdanynyń «Ǵasyrlar úni» etnografııalyq ansambli, Úrjar aýdanynyń «Aqqýlar sazy» folklorlyq ansambli, Tarbaǵataı aýdanynyń «Babalar sózi» etnografııalyq-folklorlyq ansambli, Zyrıan aýdanynyń «Zyrıanochka» halyqtyq bı ansambli, Rıdder qalasynyń kameralyq ansambli jáne basqa da óner ujymdary men ónerpazdardy kórermender ystyq yqylaspen qabyldady.
«Týǵan el – altyn besigim» aksııasy 2009 jyldan beri óńirimizdiń qalalary men aýdandarynyń damýyna erekshe serpin berdi. Aksııanyń arqasynda aýyl sharýashylyǵy ónimderiniń narqy keńeıip, aýdandaǵy mádenıet úıleri kúrdeli jóndeýden ótti, ózge aýdandarǵa qosylyp ketken burynǵy aýdan ortalyqtaryndaǵy mádenıet úıleri de kez-kelgen respýblıkalyq dárejedegi ujymdardy qabyldaı alatyndaı jaǵdaıǵa ıe boldy. Odan bólek, týǵan jer men elge arnalǵan qanshama jańa shyǵarmalar dúnıege keldi, alys aýyldardaǵy óner ujymdarynyń materıaldyq-tehnıkalyq bazasy jańartyldy. Shet elderde, Astana men Almaty qalalarynda, ózge óńirlerde júrgen áıgili jerlesterimiz týǵan ólkesine kelip, aksııanyń ajaryn ashty. Sondyqtan, bereri mol aksııa áli de jalǵasyn taba bermek. Bıyl bul shara Táýelsizdiktiń 25 jyldyq mereıtoıy sheńberinde jańa deńgeıge kóteriledi, dedi oblys ákiminiń orynbasary Jaqsylyq Omar.
Kesh barysynda Shyǵys Qazaqstan oblystyq máslıhatynyń hatshysy Vladımır Golovatıýk «Týǵan el – altyn besigim» atty aksııanyń byltyr Qazaq handyǵynyń 550 jyldyǵy, Uly Jeńistiń 70 jyldyǵy, Ata Zań men Qazaqstan halqy Assambleıasynyń 20 jyldyǵyna arnalǵanyn, atalǵan aksııanyń halyqty biriktirýdiń, ult pen ulystyń mádenıeti men ónerin nasıhattaýdyń tıimdi quralyna aınalǵanyn erekshe atap ótti.
Oblys ákiminiń orynbasary J.Omar atalǵan aksııaǵa atsalysqan qala, aýdan basshylary men óner ókilderine, shyǵarmashylyq ujymdarǵa alǵys aıtyp, aksııa jeńimpazdaryn marapattady. Olardyń arasynda Zyrıan aýdany – 3 orynǵa, Kýrchatov qalasy – 2 orynǵa, Tarbaǵataı aýdany – 1 orynǵa ıe bolsa, Aıagóz aýdany oblys ákiminiń arnaıy júldesimen marapattaldy. Al «Týǵan jer – altyn besigim!» aksııasynyń 2015 jylǵy jeńimpazy, Gran-Prı ıegeri bolyp Jarma aýdanynyń shyǵarmashylyq ujymdary tanyldy. Barlyq jeńimpazdar men júldegerler qarjylaı syılyqtarǵa ıe boldy.
Dýman Anash.
Derek, sýret: egemen.kz
