Medısına qyzmetkerleriniń jalaqysy kóbeıdi

Bıylǵy jyldyń 1 qań­tary­nan bastap bıýdjet qyzmet­kerleriniń aılyǵy ósetindigi týraly Memleket basshysy ótken jyly qarashadaǵy Joldaýynda aıtqan bolatyn. Osyǵan oraı, qazynadan arnaıy 273 mlrd. teńge bólingen. Jańa jyldaǵy ózgerister boıynsha dárigerler men ustazdardyń eńbekaqysy – 28-29,   stýdentter shákirtaqysy – 25, ózge sala qyzmetkerleriniń jalaqysy 28-40 paıyzǵa kóbeıdi. Sondaı-aq, jańa Kodeks boıynsha memlekettik qyz­met­kerler eńbekaqysyn tóleýdiń jańa júıesi engizilmek. Iаǵnı, mamandardy bilimi, bilik­tiligi, jumys kólemi men jaýap­ker­shiligi boıynsha 4 topqa bóledi. Olar: basqarý júıesi qyz­metkerleriniń, negizgi qyz­metkerler, ákimshilik qyz­met­kerleri, qosymsha qyzmet­kerler bloktary. Sonymen qatar, bul jańa júıede qosymsha eńbek saǵatyna syıaqy taǵaıyndaý jaǵy da qarastyrylǵan. Qazaq onkologııa jáne radıologııa ǴZI dırektory, professor Qýanysh Shadybaıuly Nurǵazıevtiń aıtýynsha, bul model dárigerlerdiń jumys sapasynyń artýyna jol ashady. – Biz ujym bolyp jańa Eńbek kodeksin, eńbekaqy tóleýdiń jańa júıesin talqyladyq. Dárigerlerdiń jalaqysy 28 paıyzǵa artpaq. Biraq, bul kezeń-kezeńmen júzege asyrylatyn úderis. Qazir bizde 13,5 paıyzǵa deıin aqshany kóterýge múmkindik bar. Osylaısha 28 paıyzǵa jetetin bolady. Bul ózgeris boıynsha biz qazir jumys istep jatyrmyz. Aıta ketý kerek, daǵdarys medısına salasyna salqynyn tıgizeri haq. Sol úshin de, únemdeý týraly umytpaýymyz kerek. Desek te, dári-dármekke kelgende únemdeýdiń reti kelmes. Aldaǵy ýaqytta barlyq baǵytta alǵashqy kómek kórsetý men áleýmettik qoldaý jalǵasa bermek», – deıdi onkoınstıtýt basshysy. Elbasy Joldaýy men Eńbek kodeksindegi ózgeristerge sáıkes, negizgi mamandardyń biliktiligine baılanysty jalaqysy 7 paıyzǵa artady eken. Pre­zıdent N.Nazarbaev mem­­qyz­met­kerler biliktiligin art­­tyrý týraly jıi aıtady. Byl­­tyrǵy jyly Densaýlyq saq­taý jáne áleýmettik damý mı­nıstrligi elimizdiń barlyq aıma­ǵynda qazan men qarasha aı­larynda memlekettik meke­me­ler­diń esepshileri men ózge qyz­metkerleriniń bilimin jetildirý boıynsha arnaıy kýrstar uıymdastyrdy. Oǵan barlyǵy 9 myńnan asa maman qatysty. Gúlzeınep SÁDIRQYZY, «Egemen Qazaqstan». ALMATY.