Adamnyń basyn aýystyrý múmkin be?

Osydan 50-60 jyl buryn adamzattyń búgingi múmkindigi «úsh uıyqtasa túske kir­meıtin» dúnıeler bolǵany ras. Al qazir­gi tańda ǵaryshty ıger­gen adam odan da zor ǵylymı ja­ńa­lyq­tarǵa ıek artýda. Máselen, osy ap­tanyń seısenbisinde AQSh-tyń Chıkago qalasynda jumys isteı­tin ıtalııalyq neırohırýrg Serdjıo Kanavero men onyń qytaılyq áriptesi Jen Sıaotın osy saladaǵy sensasııalyq jańalyqty jarııalady. Olardyń aıtýyn­sha, búginde hırýrgter adamnyń basyn aýys­­tyratyn otalardy jasaýǵa daıyn eken. Bul jóninde dáriger Kanavero: «Biz­diń jańalyǵymyz negizsiz emes. Osy kez­ge deıin ártúrli jan-janýarǵa táji­rı­beler júrgizip, oń nátıjege qol jet­­kizdik. Osymen tájirıbe kezeńin aıaq­taımyz. Endi mundaı otalardy adam­­­ǵa jasaýǵa daıynbyz. Osy rette atalǵan otaǵa zárý reseılik naýqas Va­­le­rıı Spı­rıdonovtyń em-domyna kómek­tesip, sol eldegi áriptesterimizge qolushy­myz­dy sozǵymyz keletinin aıt­qym kele­di», – dep málimdedi. Alaıda, ǵalymdar álemdik me­dı­sınany dúr silkindiretin osy jańalyqty júzege asyrý úshin materıaldyq jáne basqa da máse­lelerdi sheshý qajet ekenin aıtyp otyr. Sebebi, mundaı ota AQSh pen Eýropada 100 mln. dollar tursa, Reseıde ony 20 mln. dollarǵa jasaýǵa bolady. «Reseıde ózge elderden arzan bolýyna medısınalyq qurylym men hırýrgııalyq dás­túrdiń mol tájirıbesi sebep», – dedi S.Kanavero. Al Reseıdiń Vladımır qala­synda tura­tyn, baǵdarlamashy Valerıı Spırı­donovtyń ózi ıta­lııalyqtyń usynysynan bas tartpaıtynyn aıtty. Týǵan­nan arqa bulshyq etteriniń atro­fııimen aýyratyn naýqas búginde óz denesin basqara almaıtyn halge jetken. «Mundaı otaǵa shamamen 36 saǵat qajet. Osy ýaqytta naý­qas­tyń terisi buzylmas úshin onyń denesi men basyn arnaıy muz­datqysh arqyly salqyndatyp otyramyz», – deıdi dárigerler. Elaman QOŃYR, «Egemen Qazaqstan».