«Birlik» partııasy úshin – birinshi saılaý

Keshe Astana qalasyndaǵy «Qazmedıa» ortalyǵynda «Birlik» saıası partııasynyń tóraǵasy Serik Sultanǵalı aldaǵy Parlament saılaýyna baılanysty BAQ ókilderine suhbat berdi. Ol Elbasynyń Parlament Májilisi depýtattarynyń kezekten tys saılaýyn ótkizý týraly Jarlyǵyn qoldaıtynyn aıtyp, atalǵan saıası naýqanǵa partııa músheleriniń úmitker retinde qatysatynyn jetkizdi. «Elbasynyń bul Jarlyǵyn «Birlik» partııasy tolyq qoldaıdy. Mundaı sheshim taktıkalyq turǵyda óte durys. Sebebi, Májilistiń besinshi shaqyrylymy ózine júktelgen mindetti tolyǵymen oryndady. Joldaýda aıtylǵan baǵdarlamalardyń zańdyq negizin qalap, az ýaqytta aýqymdy jumys jasady. Alaıda, qazir álem tap bolyp otyrǵan qıyndyq, ekonomıkalyq daǵdarystar jańa kúshti, jańa qarqyndy, jańa ekpindi qajet etedi. Sondyqtan, saılaý ótkizip, Parlament quramyna qajyr-qaıraty mol, isker, tyń ıdeıalary bar azamattardyń kelýine múmkindik berý – eń utymdy sheshim. Bul rette bizdiń partııa úshin de bul saılaý úlken mártebe ekenin aıtqym keledi. Sebebi, qurylǵanyna tolyq eki jyl bolǵan partııamyz alǵash ret saılaýǵa qatysyp, óz baǵyn synap kóredi», – dedi S.Sultanǵalı. Sonymen qatar, ol «Birlik» partııasynyń múmkindigine toqtalyp ótti. Eki jyldyń ishinde birqatar ıgi isterge muryndyq bolǵan partııa úshin qazir óz kúsh-qýatyn baǵamdaıtyn shaq týǵanyn aıtqan S.Sultanǵalı: «Ázirge qazaqstandyqtar úshin asa tanyla qoıǵan joqpyz. Soǵan qaramastan, eki jylda óz deńgeıimizde aıtarlyqtaı jumys jasadyq. Saılaýda zań júzindegi eń az daýys úlesimizdi alsaq ta qanaǵattanamyz. Sondyqtan, aldaǵy saılaý «Birlik» partııasy úshin úlken emtıhan bolmaq», – dedi. Sondaı-aq, tóraǵa aqpan aıynda partııanyń sezi ótetinin málimdedi. «Saılaýǵa baılanysty aqpanda sezd ótkizemiz. Sol jerde depýtattyqqa úmitkerler tizimi jasalyp, baǵdarlamamyz daıyndalady. Úgit-nasıhat kezinde Qazaqstandy aralap, strategııamyzdy, josparymyzdy halyqqa jetkizemiz. Osy jumystardan keıin partııa músheleriniń sany artady dep úmittenemin. Negizinen aýyl ómirin jaqsartýǵa baǵyttalǵan ustanymymyz halyq tarapynan qoldaý tabaryna senemin», – dedi partııa tóraǵasy. Aıta keteıik, qazirgi tańda «Birlik» partııasynyń 53 myń múshesi bar. Elaman QOŃYR, «Egemen Qazaqstan».