Salvadorda turǵyndarǵa bala týýdan bas tartýǵa keńes berildi

ASTANA. 23 qańtar. Ortalyq Amerıkada ornalasqan Salvador memleketinde turǵyndarǵa aldaǵy eki jylda bala týýdan bas tartýǵa keńes berildi. Oǵan el aýmaǵynda zıka indetiniń taralýy sebep bolyp otyr. Bul týraly euronews telearnasyna silteme jasaǵan egemen.kz tilshisi habarlady. Mamandardyń aıtýynsha, atalǵan vırýs anadan balaǵa beriledi eken. Saldarynan balanyń boıynda ártúrli aýrýlardy qozdyryp, mıkrosefalııaǵa (bas súıek pen mıdyń jetilmeýi, aqyl-oıdyń damymaýy jáne nevrologııalyq aýytqýshylyq) jáne kórý múmkindiginiń nasharlaýyna ákeledi. Qazirdiń ózinde vırýstan saqtanǵan AQSh óz azamattaryna álemniń 22 eline barmaýǵa keńes berýde. Bul jónide osy eldiń Aýrýlarǵa baqylaý júrgizý jáne aldyn alý ortalyǵynyń mamany Bet Bell: «Zıka indeti aıaǵy aýyr áıelderdiń aǵzasyna erekshe áser etedi. Sondyqtan ázirge kesel taraǵan aımaqtarǵa barmaǵan durys», – deıdi. Aıta keteıik, ótken jyldyń jeltoqsan aıynda Dúnıejúzilik densaýlyq saqtaý uıymy Latyn Amerıkasynyń birqatar elinde zıka vırýsynyń taraǵanyn habarlaǵan bolatyn. Indet saldarynan Brazılııa eń kóp zardap shegip otyr. Qazirgi tańda bul elde mıkrosefalııa belgisi bar 3,5 myń jańa týǵan náreste tirkeýge alynǵan. Negizinen masa arqyly taralatyn bul vırýs adam ómiri úshin asa qaýipti emes. Kóbine jeńil áser etedi jáne birneshe kúnde ózdiginen joıylyp ketedi. Alaıda, aıaǵy aýyr áıelder úshin úlken qaýip tóndirip tur. Mamandar ázirge keseldiń aldyn alatyn dári-dármekti tapqan joq. Elaman Qońyr. Derek: euronews. Sýret: materlife.ru.