ASTANA. 24 qańtar. Keshe túnde Reseıdiń Sankt-Peterbýrg qalasynda fýtboldan jastar arasyndaǵy (U-21) halyqaralyq «Dostastyq» Kýbogynyń XXIV týrnıri máresine jetti. Onyń fınalynda Moldova quramasyn 4:2 esebimen utqan Reseı komandasy Kýbok ıegeri atandy. Bul týraly ras.kz-ke silteme jasaǵan egemen.kz habarlady.
Bıylǵy maýsymda týrnırge qatysýshy quramalar sany qaı jyldarǵa qaraǵanda da, edáýir az boldy. Bul joly Kýbokty nebári 8 jasaq sarapqa saldy.
Keshe eń sońynan oınalǵan fınaldyq matchta moldovandar birinshi bolyp esep ashty (Dan Spetarý, 9-mınýt). Arada 2 mınýt ótkende, reseılik Alekseı Sýtmorın esepti teńestirdi. Ekinshi taımda alań ıeleri taǵy úsh gol soqty. Olardy Ilıa Petrov (67), Maksım Karpov (73) jáne Kamıl Mýllın (80) túsirdi. Sońynan moldovan Aleksandrý Boıchýk (82) taǵy bir goldyń qarymtasyn qaıtardy.
Al munyń aldynda ǵana Qyrǵyzstan jáne Estonııa komandalary 3-oryn úshin talasty. Kezdesýdiń negizgi ýaqytynda esep ashylmady. Sodan keıin qarsylastar penaltıge júgindi. Onda estondar mergendik pen salqynqandylyq tanytty. Esep – 4:1.
Osy kúni komandalar 5 jáne 7-oryndardyń da taǵdyrlaryn sheshti. Sonyń ishinde 5-oryn úshin Belarýs pen Latvııa arasyndaǵy ushyrasýda da fýtbolshylar negizgi ýaqytta qaqpa qulpyn asha almaı, oıynnan keıingi penaltı arqyly kúshterin anyqtady. Ol bulardyń aldyńǵylaryna jeńis ákeldi – 5:4.
Bul kúngi saıysty bastaǵan Qazaqstan jáne Tájikstan quramalary 7-oryn úshin talasty. Ol 3:2 esebimen qazaqstandyqtardyń paıdasyna sheshildi. Match birden bizdiń baǵlandardyń shabýylymen bastaldy. Olar alǵashqy goldy da tym erte saldy – 2-mınýtta Ánýar Aǵaısınniń aıaǵynan ushqan dop tordan bir-aq shyqty. Al 14-mınýtta Abat Áıimbetov ekinshi goldy da túsirip úlgerdi. Sodan soń tájik Nozım Babodjonov (17) bir gol salyp ketti. Qalǵan eki gol kezdesý sońyna qaraı salyndy. Munyń alǵashqysyn 83-mınýtta Áıimbetov óz esebine jazsa, kelesisine 85-mınýtta tájik Jahongır Ergashov qol jetkizdi. Oǵan deıin, 76-mınýtta alańda tóbeles bastap ketken qazaqstandyq Ivan Antıpov pen tájikstandyq Tabrezı Davlatmır alańnan qýyldy. Olardyń ustasýlary eki jaqtan da qoldaý alyp, jappaı tóbeleske ulasyp kete jazdady.
Komandalar týrnırdiń irikteý kezeńin eki topqa bólinip oınaý arqyly bastady. A tobyna túsken Qazaqstan quramasy qarsylastarymen (Belarýs, Qyrǵyzstan) 2 ret teń oınap, 1 ret utyldy (Moldova). Sóıtip, 4 komandanyń eń sońynda qalyp qoıdy.
Týrnır 17 qańtarda bastaldy. Kelesi týrlar 19, 21 qańtar kúnderi oınaldy.
Irikteý tobyndaǵy oıyndar mynadaı nátıjeler ákeldi:
1-týr. 17 qańtar
Reseı – Tájikstan 2:1, Latvııa – Estonııa 1:2, Qazaqstan – Moldova 0:1, Belarýs – Qyrǵyzstan 0:1.
2-týr. 19 qańtar
Reseı – Latvııa 2:1, Tájikstan – Estonııa 1:4, Qazaqstan – Belarýs 0:0, Moldova – Qyrǵyzstan 2:0.
3-týr. 21 qańtar
Estonııa – Reseı 1:2, Latvııa – Tájikstan 3:2, Qyrǵyzstan – Qazaqstan 2:2, Belarýs – Moldova 2:1.
A toby
| № |
Komandalar |
O |
U |
T |
J |
Dop |
Up |
| 1 |
Moldova |
3 |
2 |
0 |
1 |
4:2 |
6 |
| 2 |
Qyrǵyzstan |
3 |
1 |
1 |
1 |
3:4 |
4 |
| 3 |
Belarýs |
3 |
1 |
1 |
1 |
2:2 |
4 |
| 4 |
Qazaqstan |
3 |
0 |
2 |
1 |
2:3 |
2 |
V toby
| № |
Komandalar |
O |
U |
T |
J |
Dop |
Up |
| 1 |
Reseı |
3 |
3 |
0 |
0 |
6:3 |
9 |
| 2 |
Estonııa |
3 |
2 |
0 |
1 |
7:4 |
6 |
| 3 |
Latvııa |
3 |
1 |
0 |
2 |
5:6 |
3 |
| 4 |
Tájikstan |
3 |
0 |
0 |
3 |
4:9 |
0 |
Endi «Dostastyq» Kýbogynyń tarıhy jóninde birer sóz.
Týrnır 1993 jyldyń qańtarynan bastalady. Bastapqyda ol TMD jáne Baltyq elderi chempıondarynyń kýbogy retinde ómirge keldi. Ol osylaısha 1993-2011 jyldar aralyǵynda osy klýbtyq komandalardyń qatysýlary arqyly ótkizildi.
Osy jyldarda «Spartak» (Máskeý, Reseı) – 6 ret (1993, 1994, 1995, 1999, 2001, 2001), «Dınamo» (Kıev, Ýkraına) – 4 ret (1996, 1997, 1998, 2002), «Sherıf» (Tıraspol, Moldova) 2 ret (2003, 2009) Kýbokty jeńip aldy. Taǵy 7 komanda týrnırde bir retten jeńiske jetti. Olardyń qataryndaǵy «Dınamo» (Tbılısı, Grýzııa) – 2004, «Lokomotıv» (Máskeý, Reseı) – 2005, «Neftchı» (Baký, Ázerbaıjan) – 2006, «Pahtakor» (Tashkent, О́zbekstan) – 2007, «Hazar-Lenkoran» (Lenkoran, Ázerbaıjan) – 2008, «Rýbın» (Qazan, Reseı) – 2010 jáne «Inter» (Baký, Ázerbaıjan) 2011 jyldary jeńimpaz atandy.
Qazaqstandyqtar sapynan eń joǵary tabysqa jetken «Aqtóbe» 2009 jáne 2010 jyldary fınalda oınap, «Sherıf» pen «Rýbınge» oıynnan keıingi penaltıde ese jiberip aldy.
Týrnır 2012 jyldan bastap jastary 21-ge deıingi jastar quramalarynyń týrnırine aınaldy. Oǵan endi qatysýǵa tilek bildirgen terme jamaǵattardyń bárine ruqsat berildi.
Sodan beri Reseı (2012, 2013, 2016) quramasy 3 ret, Ýkraına (2014) men OAR (2015) bir retten jeńimpazdar tuǵyryna kóterildi.
Talǵat Raıymbek.
Derek, sýret: ras.kz.
