Beıjiń bıligi qala halqynyń sanyna shekteý qoımaq

ASTANA. 24 qańtar. Qytaı astanasy – Beıjiń qalasynyń bıligi shahar halqynyń sanyn 2020 jyly 23 mıllıonnan asyrmaýdy josparlap otyr. Oǵan megapolıs turǵyndaryn qamtamasyz etetin resýrstardyń tapshylyǵy sebep bolyp otyr. Bul týraly TASS agenttigine silteme jasaǵan egemen.kz tilshisi habarlady. «Sınhýa» agenttiginiń habarlaýynsha, Qytaıdyń zań shyǵarýshy organy – Halyq ókilderiniń jınalysy men qalanyń Halyqtyq saıası konsýltatıvti keńesiniń jıynynda Beıjińniń áleýmettik, kólik qatynasy jáne ekonomıkalyq resýrstaryna baǵa berilip, osyndaı másele kóterilgen. Búginde el astanasyndaǵy eń ózekti máselelerdiń biri sýmen qamtamasyz etý ekenin atap ótken jón. Qala meri Van Anshýnniń aıtýynsha, aldaǵy bes jylda halyqty megapolıstiń ortalyǵynan shet aýdandarǵa ornalastyrý jumystary júrgiziledi. Soǵan oraı, ortalyqtaǵy turaqty turǵyndar sanyn 2014 jylǵy kórsetkishten 15 paıyzǵa azaıtý kózdelip otyr. Aıta keteıik, 2015 jylǵy sanaq qorytyndysy boıynsha, Beıjińde 21,7 mıllıon adam turatyny anyqtaldy. Jergilikti bılik 2016 jyldyń sońyna deıin bul kórsetkishti 22 mıllıonnan asyrmaýdy josparlap, soǵan qatysty baǵdarlamalardy qolǵa alýda. Elaman Qońyr. Derek: TASS. Sýret: kalipsoua.com.