Pavlodarda jol talǵamaıtyn kólik muzǵa túsip ketti

ASTANA. 24 qańtar. Pavlodarda eki balyqshy mingen djıp kóligi Ertis ózeniniń ústimen júrip kele jatqanynda, oıyqqa tap kelip, muz astyna ketip qaldy. Bul týraly ras.kz-ke silteme jasaǵan egemen.kz habarlady. «Salmaǵy birneshe tonna bolatyn jol talǵamaıtyn kólik óziniń aýqymy úlkendiginen sý astyna ketken joq – bul jerdegi muzdyń qalyńdyǵy 70 santımetrden asatyn. Kýágerlerdiń aıtýlarynsha, balyqshylardyń tek joly bolmaǵan, olar qardyń qalyńdyǵynan ózen boıyndaǵy oıyqty baıqamaı qalǵan. Balyqqa basqa jolmen barǵan da, qaıtarda basqa jaqpen qaıtqan. Kólik ishindegi eki jigit sońǵy sátte esikti ashyp, syrtqa sekirip úlgergen», – delingen habarlamada. Sondaı-aq, derekte Ertis ózeniniń Pavlodar oblysy aýmaǵyndaǵy bóliginde muz ústindegi ótkel-kúzerlerdiń qańtardan jumys jasaı bastaǵany aıtylǵan. Aıta keteıik, kýágerlerdiń habarlaýynsha, jurttyń kóbi arǵy betke óterde joldy qysqartý úshin olardyń oryna tótelep óte salǵandy jón kóredi eken. Buǵan qosa, qysqy balyq aýlaýdy unatatyn balyqshylar kóp jaǵdaıda tehnıkalyq qaýipsizdikti saqtamaıdy. Talǵat Raıymbek. Derek, sýret: ras.kz.