Almatynyń ishki óńirlik ónimi alǵash ret 8,5 trıllıon teńgeden asty

ALMATY. 25 qańtar. Apta sońynda Almatynyń 2015 jylǵy áleýmettik-ekonomıkalyq damýynyń qorytyndysy boıynsha ótken jıynda Almatynyń ishki óńirlik ónimi alǵash ret 8,5 trıllıon teńgeden asqany týraly málimdeme jasaldy. Bul týraly egemen.kz tilshisi habarlady. Megapolıs búkil elimiz boıynsha respýblıkalyq ishki jalpy ónimniń bes bóligin, barlyq salyq túsiminiń 27 paıyzyn, kóterme saýdanyń 48 paıyzyn, bólshek saýdanyń 23 paıyzyn, syrtqy saýda aınalymynyń alty bóligin, ekinshi deńgeıli bankterdiń nesıe portfeliniń 60 paıyzyn qamtamasyz etedi. Almatynyń negizgi tabys kózi – kishi jáne orta bıznes kásiporyndary bolyp tabylady. Olar ishki óńirlik ónimniń 25 paıyzyn, salyq jáne basqa da tólemderdiń 43 paıyzyn beredi. Sol sııaqty Almatyda áleýmettik salaǵa turaqty kóńil bólinip, naqty sharalar atqarylýda. Qazirgi kezde memlekettik-jeke seriktestik áriptestik aıasynda 25 balabaqsha salý josparlanǵan. Jáne balabaqsha jetispeýshiligin joıý úshin bos kottedjderdi balabaqshaǵa kóshirý jumystary qolǵa alyndy. Buǵan qosa 2015 jyly bıznestiń áleýmettik jaýapkershiligi aıasynda Almatyda 108 balalardyń oıyn alańdary salyndy. 2016 jyly osyndaı taǵy da 150 alań salý josparlanýda. Alataý aýdanynda Ýnıversıada nysandary boı kóteredi, 12 myń oryndy Muz saraıy, atletter aýyly, al Medeý aýdanynda 3 myń oryndy Muz arenasy salynýda. Aınash Esalı. Derek, sýret: egemen.kz.