О́SKEMEN. 25 qańtar. Shyǵys Qazaqstan oblysy ákimdiginiń bastamasymen О́skemende rejısser Doshan Joljaqsynovtyń «Qunanbaı» kórkem fılmi kórsetildi. Bul týraly egemen.kz tilshisi habarlady.
Atalǵan fılm «Qazaqfılm» kınostýdııasy men oblys ákimdiginiń qoldaýymen 2014 jyly Abaı aýdanynda túsirilgen bolatyn. Sondyqtan ótken jyly kınokartınanyń elimizdegi tuńǵysh tusaýkeseri Abaı aýdanynyń ortalyǵy Qaraýyl aýyly men Semeı qalasynda uıymdastyryldy. Bul joly oblys ákiminiń orynbasary Jaqsylyq Omardyń uıytqy bolýymen óskemendik kórermenniń nazaryna usynyldy. «Iýbıleınyı» kınoteatrynda ótken kórsetilimge kórermenderdiń kóp jınalǵany sonshalyq, olardyń birqataryna oryn jetpeı, edenge otyryp kórdi. Tusaýkeserge fılm rejısseri ári basty rólde oınaǵan akter Doshan Joljaqsynov ta qatysty.
Fılmniń alǵashqy tusaýkeserin el oqyrmandaryna «Egemen Qazaqstan» gazeti jetkizgen bolatyn. Semeı qalasyndaǵy kórsetiliminen keıin «Ekranda – Qunanbaı» atty maqala erteńgilik gazetke jarııalandy. Sondyqtan, fılm jóninde emes, fılmge degen kórermen yqylasy jóninde áńgimeleıik. Kınokartına shyǵysqazaqstandyqtardyń kóńilinen shyqty. Fılm aıaqtalǵanda zalda janǵan jaryqtan kópshiliktiń bulaýdaı bolǵan kózderin súrtip otyrǵanyn kórip, tyń týyndynyń óte áserli bolǵandyǵyn baıqadyq.
«Doshan aǵamyzǵa shyǵysqazaqstandyqtardyń atynan kóp rahmet aıtamyz. Búgingi fılm, bir sózben aıtqanda, tarıhı aqıqattyń jeńisi! Qunanbaı babamyzdyń kesimdi sózi ispetti aqıqat pen ádildiktiń de shyǵar bıigi árdaıym joǵary bolsyn!», – dedi fılmdi tamashalaýǵa arnaıy kelgen oblys ákiminiń birinshi orynbasary Nurymbet Saqtaǵanov.
«Doshandaı talantty baýyrymdy qazaqqa syılaǵan Allaǵa, ata-anasyna rahmet! Bul kıno kópti kórgenimen basqasha oqyp, zerdelegen bizdiń muqym qazaqtyń, alty Alashtyń tarıhyn jetik bile bermeıtinimizdi kórsetti. «Birjan sal» fılmin de týǵan jerine alyp kelip kórsetkende, qatysqan edim. Qunanbaı babamyz týraly kınodan naǵyz qazaqtyń júrek lúpilin kórdik. Osyndaı týyndylar kóbeıe bersin!», – dedi О́skemen qalasy aqsaqaldar keńesiniń tóraǵasy Saılaýhan Aýhadıev.
О́zin «Abaı aýdanynyń týmasymyn» dep tanystyrǵan kórermenderdiń biri fılmdi kórip otyryp, týǵan jerine baryp kelgendeı áser alǵanyn, shynaıy qoıylǵan kartınada obrazdardyń ashylýy, ásirese, Zere ananyń bolmysy kózge jas alarlyqtaı kesek somdalǵanyn aıryqsha atap ótti.
«Alashtyń taý tulǵalarynyń biri, qara qyldy qaq jaryp, ádildiktiń sózin sóılegen Qunanbaı atamyz týraly halyq arasynda teris kózqaras, qasań áńgimeler bolǵany belgili. Alaıda, Táýelsizdigimizben birge bul túsinik te ózgerip, Qunanbaı atamyzdyń alǵyr, sheshen, halyqshyl, elshil bolǵandyǵy kórkem fılmnen málim boldy. Biz osy jolmen júrsek adaspaımyz. Búgin Elbasy aıtqan «Máńgilik El» ıdeıasyn júzege asyrý jolyndaǵy jańa mánge ıe fılmniń túsirilgenin kórip, qýandyq», – degen Sársen Amanjolov atyndaǵy Shyǵys Qazaqstan memlekettik ýnıversıtetiniń stýdenti Berik Kádiruly atalǵan ýnıversıtetten fılmdi tamashalaýǵa 20-dan astam stýdentter kelgenin, kartına jastardyń júregine jol tapqanyn jetkizdi.
«О́ner adamy ishten shyqqan shubar jylanyn aldaryńyzǵa pash etken kezde shynymen kókirekterińizge jetip jatsa, árıne, rahmet! Munda búgingimen sabaqtasqan talaı astarlar jatyr, onsyz óner bolmaıdy», – dedi Doshan Joljaqsynov. Rejısser fılmniń aldaǵy ýaqytta telearnalarda kórsetiletinin jetkizdi. Kórsetilim sońy kórermender men kınorejısser arasyndaǵy erkin suhbatqa, rııasyz tilekke ulasty.
Dýman Anash.
Derek: egemen.kz.
Sýret: Eljan Qaıyrhanov.
