Qostanaıda burynǵy ákiminiń ústinen sot isi bastaldy

QOSTANAI. 25 qańtar. Qostanaı qalasynyń burynǵy ákimi, «ákimıat isi» atty shýly istiń basty tulǵasy Ahmedbek Ahmetjanovqa qatysty sot isi bastaldy. Bul týraly egemen.kz tilshisi habarlady. Sotty mamandanldyrylǵan aýdanaralyq qylmystyq sotynyń sýdıasy Elik Seralın júrgizedi. Ahmetjanov osyǵan deıin úı qamaǵynda otyrǵan bolatyn. Ol advokaty Vasılıı Belonojkomen sotqa ózi keldi. Dabyrly istiń ózge fıgýranttary – qala ákiminiń burynǵy orynbasary Maqsut Qalıevti, kásipkerler Leonıd Vasılev pen Gagık Ovnanıandy jáne Sergeı Bektibaevty konvoı alyp keldi. Eske sala ketsek, oblys ortalyǵynyń burynǵy ákimi Ahmedbek Ahmetjanov ótken jyldyń 11 qyrkúıeginde úı qamaǵyna alynǵan bolatyn. Oǵan áý basta laýazymdyq qyzmetin asyra paıdalanǵan, kásipkerlikke kedergi jasaǵan degen kiná taǵylǵan bolatyn. Endi sotqa deıingi tergeý barysynda 74 mıllıon teńge para aldy degen aıyp qosylyp otyr. Názıra Járimbetova. Derek, sýret: egemen.kz.