Atyraý kásipkeri eki otbasyn qamqorlyǵyna aldy

ATYRAÝ. 25 qańtar. Atyraý oblysynda sharýa qojalyǵy jáne azyq-túlik dúkeni bar kásipker Murat Sarmanov turmysy tómen eki otbasyn jyl aıaǵyna deıin nan, sút, maı jáne etpen tegin qamtýdy uıǵardy. Ol oblys kásipkerlerin osyndaı qaıyrymdylyq is jasaýǵa shaqyrdy. Bul týraly egemen.kz tilshisi habarlady. Qyzylqoǵa aýdanyndaǵy sharýa qojalyǵynda mal sharýashylyǵyn órkendetý isin qolǵan Murat Sarmanov bul oıyn Atyraý qalasyna qarasty Geolog kenttik okrýginiń ákimi Nurjan Jumahanovtyń halyq aldyndaǵy esep berý jıynynda málim etti. Bul jıynǵa oblys ákimi Baqtyqoja Izmuhambetov pen Atyraý qalasynyń ákimi Nurlybek Ojaev qatysqan bolatyn. Kenttiń ózge turǵyndary jol, kóshe jaryǵy sekildi kópti tolǵandyrǵan máselelerdi kóterdi. О́zine sóz kezegi tıgen kásipker jergilikti basshylardan turmysy tómen eki otbasynyń aty-jónin, mekenjaıyn berýdi surady. Ol eki otbasyn jyl aıaǵyna deıin birinshi kezekte tutynatyn nan, sút, maı jáne et sekildi azyq-túlikpen qamtýǵa bekinip otyr. «Internetten adamdardyń qoqys aqtaryp júrgen fotosyn kórdim. Astyna «Daǵdarys bastaldy» degen pikir jazylypty. Bul foto qaıda túsirilgenin bilmeımin. Biraq bulaı bolmaýy tıis. Biz dál qazirgi kezde bir-birimizge qoldaý kórsetýimiz qajet. Oblys kásipkerlerin qaıyrymdylyq tanytýǵa shaqyramyn. Eń bolmasa, bıyl atsalyńyzdar», –dedi kásipker Murat Sarmanov. Joldasbek Shópeǵul. Derek: egemen.kz. Sýret: Rahym Qoılybaev.