Parlament saılaýynyń úgit-nasıhat jumystary 20 aqpanda bastalady

ASTANA. 25 qańtar. Búgin Astana qalasynda 2016 jylǵy 20 naýryzǵa taǵaıyndalǵan Parlament Májilisi men barlyq deńgeıdegi máslıhattar depýtattaryn saılaýdy ázirleý men ótkizýdi uıymdastyrý máseleleri jóninde respýblıkalyq semınar-keńes ótti. Bul týraly inform.kz-ke silteme jasaǵan egemen.kz tilshisi habarlady. Semınar-keńestiń jumysyna qatysýǵa oblystyq, Astana jáne Almaty qalalyq saılaý komıssııalarynyń tóraǵalary men hatshylary, saıası partııalardyń, múddeli memlekettik organdardyń ókilderi, sondaı-aq, saılaý salasynda qyzmet etetin halyqaralyq uıymdardyń ókilderi shaqyryldy. Ortalyq saılaý komıssııasynyń tóraǵasy Qýandyq Turǵanqulov qatysýshylardy Komıssııanyń atqarǵan daıyndyq jumystary, qyzmeti jáne saılaý naýqanynyń barysy týraly qysqasha aqparattandyrdy. Sondaı-aq, tóraǵa úmitkerler men saıası partııalarǵa saılaý aldyndaǵy úgit-nasıhat jumystaryn júrgizýge teńdeı múmkindik jasaý qajettigin atap ótti. «BAQ arqyly úgit-nasıhat jumystary tirkeý merzimi aıaqtalǵannan keıin bastalady. Atap aıtqanda, saıası partııalar úshin úgit-nasıhat jumystary 20 aqpanda, Qazaqstan halqy assambleıasy atynan Májilis depýtattyǵyna úmitkerler úshin 6 naýryzda, al máslıhat depýtattyǵyna kandıdattarǵa 24 aqpanda bastalady. Úgit-nasıhat jumystary bastalǵanǵa deıin saıası partııalardyń maqsattary men mindetterin nasıhattaıtyn jarnamalyq materıaldardyń barlyǵyna da partııanyń saılaý qorynan qarjy tólenýi tıis. Odan bólek, saılaý aldy úgit-nasıhatty qamtıtyn barlyq materıaldarda qarjylandyrý kózderi týraly aqparat bolýy qajet», – dedi Qýandyq Turǵanqulov. Elaman Qońyr. Derek: inform.kz. Sýret: election.kz.