Qazaqstanda shoshqa tumaýyn juqtyrǵandar sany azaımaı otyr

ASTANA. 25 qańtar. Qazirgi tańda Qazaqstan aýmaǵynda shoshqa tumaýynyń taralýy mamandardy alańdatyp otyr. Búginge deıin elimizdiń ár óńirinde H1N1 vırýsyn juqtyrǵan 270 naýqas tirkelgen. Bul týraly today.kz saıtyna silteme jasaǵan egemen.kz tilshisi habarlady. Ulttyq ekonomıka mınıstrligi tutynýshylardyń quqyǵyn qorǵaý jónindegi komıtet tóraǵasynyń orynbasary – Qazaqstannyń bas memlekettik sanıtar dárigeri Jandarbek Bekshınniń aıtýynsha, eń kóp jaǵdaı Atyraý oblysynda tirkelgen. Munaıly ólkede 41 adamnyń atalǵan indetti juqtyrǵany anyqtalyp otyr. Sondaı-aq, Qyzylorda jáne Mańǵystaý oblystarynda – 38, Astana qalasynda 31 naýqas shoshqa tumaýyna shaldyqqan. Odan bólek, sońǵy aptada Ońtústik Qazaqstan jáne Aqtóbe oblystarynda da jaǵdaıdyń ýshyǵyp turǵany belgili boldy. Atap aıtqanda, Ońtústik Qazaqstanda – 37, al Aqtóbe óńirinde 28 naýqas tirkelgen. Osy rette elimiz boıynsha osy dertten 1 adamnyń qaıtys bolǵanyn atap ótken jón. Jandarbek Bekshın aýrýdyń belgileri baıqalǵan kezde birden dárigerlerge kórinýge keńes berdi. «Bizde kóbine adamdar ózderin ózderi emdeıdi. Ol durys emes. Keıin jaǵdaı asqynǵan kezde bári kesh bolýy múmkin. Sondyqtan, atalǵan tumaýdyń belgileri baıqalsa, birden mamandarǵa kóriný kerek», – degen ol aýrýdyń bastapqy belgilerin aıtyp berdi. Onyń sózine qaraǵanda, eger ádettegi tumaý bolsa, 5-7 táýlikten keıin asqynýy múmkin. Al shoshqa tumaýynda adam ekinshi, úshinshi táýlikte syr beredi. Negizgi sımptomdary – dene qyzýynyń kúrt kóterilýi, tipti 39 gradýstan joǵary bolady. Sondaı-aq, bulshyq etter qurysyp, býyndar syrqyraıdy. Elaman Qońyr. Derek: today.kz. Sýret: potoksmivip.ru.